पुणे : लक्ष्मण जगताप, मुक्ता टिळक या लढवय्या आमदारांना भाजपचा विजय समर्पित- देवेंद्र फडणवीस

पिंपरी: राज्यसभा निवडणुकीतील भाजपचा विजय हा लढवय्ये आमदार लक्ष्मण जगताप आणि मुक्ता टिळक यांना समर्पित आहे, अशा शब्दात माजी मुख्यमंत्री देवेंद्र फडणवीस यांनी दोन्ही आमदारांविषयी कृतज्ञता व्यक्त केली.आमदार जगताप यांची प्रकृती हे गेल्या दोन महिन्यांपासून नाजूक आहे. जवळपास दीड महिन्यांच्या उपचारानंतर गेल्या आठवड्यात त्यांना रूग्णालयातून घरी सोडण्यात आले. अजूनही ते पूर्णपणे बरे झालेले नाहीत व घराबाहेरही पडत नाहीत. त्यांना भेटण्याची कोणालाही परवानगी नाही.

अशा परिस्थितीतही फडणवीस यांच्या विनंतीनुसार आणि डॉक्टरांच्या संमतीने जगताप यांनी रूग्णवाहिकेतून मुंबईला जाऊन राज्यसभा निवडणुकीतील मतदानात सहभाग घेतला. प्रत्येक मताचे महत्त्व असताना आणि शरीर साथ देत नसतानाही आमदार जगताप तसेच मुक्ता टिळक यांनीही मतदानात सहभाग घेतला. अटीतटीच्या लढतीत भाजपचा तिसरा उमेदवारही निवडून आला. त्यामुळे भाजप वर्तुळात जल्लोष सुरू आहे.

याविषयी प्रसारमाध्यमांसमोर बोलताना फडणवीस यांनी या विजयाचा आनंद व्यक्त केला. भाजपचे हे यश, आमदार जगताप तसेच टिळक यांच्या लढवय्येपणाचे आहे. हा विजय त्यांना समर्पित करतो, अशी प्रतिक्रिया त्यांनी व्यक्त केली.