Pune : पुढील दोन दिवस पावसाची शक्यता; राज्यातील 21 पेक्षा अधिक जिल्ह्यांना यलो अलर्ट, जाणून घ्या कसं असेल हवामान

Pune : उन्हाची तीव्रता आणि उकाड्याने हैराण पुणेकरांना बुधवारी संध्याकाळी झालेल्या पावसाने सुखद दिलासा मिळाला. जिल्ह्यातही अनेक ठिकाणी पावसाने हजेरी लावली. पुढील दोन दिवस शहरात दुपारनंतर आकाश ढगाळ राहणार असून, मेघगर्जना आणि विजांच्या कडकडाटासह हलक्या पावसाची शक्यता, भारतीय हवामानशास्त्र विभागाने व्यक्त केली आहे.

पुण्यात विविध भागांत पाऊस
मध्यवर्ती पुण्यासह उपनगरांमध्ये बुधवारी दुपारनंतर आकाशात ढग दाटून आले. वादळी वाऱ्यासह काही भागात हलक्या स्वरूपाच्या पावसाने हजेरी लावली. तापलेल्या जमिनीवर पावसाचे पाणी पडल्यावर क्षणार्धात वातावरणात मातीचा सुगंध दरवळला.

गेल्या पंधरा दिवसांपासून सकाळपासून वाढत जाणारा उन्हाचा चटका आणि उकाड्यामुळे नागरिक हैराण झाले आहेत. दुपारी रस्त्यावरून फिरतानाही नागरिकांना उन्हाचे चटके जाणवत आहेत. बुधवारी मात्र दुपारनंतर उन्हाची तीव्रता ओसरली आणि सायंकाळी पाचपर्यंत आकाशात ढग दाटून आले. वादळी वारे आणि ढगांच्या गडगडामुळे आता पाऊस हजेरी लावणार या विचारानेही पुणेकरांना दिलासा मिळाला.

पुणे स्टेशन, येरवडा भागात सायंकाळी सहाच्या सुमारास पावसाच्या सरी कोसळल्या, कोथरूड, पाषाण, सिंहगड रस्ता, सातारा रस्त्यावर काही ठिकाणी हलक्या सरी पडल्या.

राज्यात काही ठिकाणी गारपीट
दरम्यान, राज्यातही ठिकठिकाणी पावसाच्या सरी कोसळल्या. दरम्यान, नाशिक जिल्ह्यात गारपिटीसह पाऊस झाला. मराठवाड्यातही गारपिटीसह पावसाने हजेरी लावली. विदर्भातील गडचिरोली जिल्ह्यातही सरी कोसळल्या. या पावसामुळे शेतपिकांचे नुकसान झाले आहे.

या जिल्ह्यांना यलो अलर्ट जारी
चंद्रपूर, गडचिरोली, गोंदिया, नागपूर, वर्धा, यवतमाळ, छत्रपती संभाजीनगर, जालना, परभणी, बीड, लातूर, धाराशिव, पुणे, सोलापूर, सातारा, सांगली, अहिल्यानगर, कोल्हापूर, धुळे, नंदुरबार, नाशिक, जळगाव, रत्नागिरी, रायगड, नांदेड, हिंगोली

शहरात बुधवारी नोंदवलेले तापमान
स्टेशन -कमाल -किमान
(अंश सेल्सिअसमध्ये)
लोहगाव ---३७.८ ---२०.९
शिवाजीनगर ---३५.२ ---१८.५
पाषाण ---३५.५ ---१८.२
चिंचवड ---३५.८ ---२१.४
हवेली ---३३.५ ---१५.६
एनडीए ---३५.१ ---१७.६
आंबेगाव ---३३ ---१६.९
हडपसर ---३२.२ ---२०.८