Rain Update : मुसळधार पावसाने जनजीवन विस्कळीत; बोरी नदीवरील पुलावरून पाणी, धाम प्रकल्प ओव्हरफ्लो

Wardha/ Dharashiv : राज्यात मागील चार- पाच दिवसांपासून जोरदार पाऊस होत आहे. तर काही ठिकाणी पावसाची संततधार सुरु असल्याने जनजीवनावर याचा परिणाम झाल्याचे पाहण्यास मिळत आहे. मुसळधार पावसाने नद्यांना पूर आला असून तुळजापूरच्या बारूळ गावातील बोरी नदीवरील पुलावरून पाणी वाहत आहे. या पुलावरून वाहनधारक जीवघेणा प्रवास करत आहेत. तर वर्धेतील महाकाली येथील धाम प्रकल्प ओव्हरफ्लो झाला आहे.

वर्धेतील महाकाळी येथील धाम प्रकल्प ओव्हरफ्लो वर्धा : मुसळधार पावसामुळे जिल्ह्यातील धाम प्रकल्पाच्या पाणी पातळीत मोठी वाढ झाली आहे. वर्धा शहरासह आजूबाजूच्या अकरा ग्रामपंचायतीला पाणी पुरवठा करणारा महाकाळी येथील धाम प्रकल्प शंभर टक्के भरला असून धरणातील पाणी ओसंडून वाहत आहे. यामुळे वर्धा शहराच्या पाण्याचा प्रश्न मिटला आहे. या प्रकल्पाची दोन मिटरने उंची वाढवित ३४ स्वयंचलित दरवाजे बसविण्यात आले आहे. सध्या या दरवाज्यामधून पाण्याचा नदीत विसर्ग सुरु आहे.

Mumbai : मुंबईची तुंबई! मिठी नदी धोक्याच्या पातळीवर, बीकेसीतह पाणीच पाणी; मुंबईकरांची दाणादाण

बोरी नदीवरील पुलावरून पाणी धाराशिव : धाराशिवच्या तुळजापूर तालुक्यात गेली दोन- चार दिवसांपासून सतत सुरू असलेल्या पावसामुळे बारूळ गावातील बोरी नदीवरील पुलावरून पाणी वाहत आहे. या पाण्यातुन गावातील शेतकरी, विद्यार्थी आणि वाहनधारकांचा वाहत्या पाण्यातून जीवघेणा प्रवास सुरू आहे. मुलांना कडेवर घेऊन पाण्यातून शाळेत पोहोचवावं लागत असल्याची परिस्थिती ठिकाणी पाहायला मिळत आहे. बोरी नदीवरील या पुलाचे काम व्हावे; यासाठी गावकरी पाच ते सहा वर्षांपासून मागणी करत असूनही प्रशासनाच्या दुर्लक्षामुळे बोरी नदीवरील पुलाची उंची वाढवली जात नसल्याचा आरोप गावकऱ्यांनी केला आहे.

शहापूरमध्ये अनेक दुकानात शिरले पावसाचे पाणी शहापूर : शहापूर शहरात पावसाची संततधार सुरु आहे. यामुळे नजराणा कंपाऊंड येथील परिसरातील अनेक दुकानांमध्ये शिरले पाणी असून पाण्याचा जोर कायम राहिल्यास छत्रपती शिवाजी महाराज चौकामध्ये देखील पाणी भरण्यास सुरुवात झाली आहे. परिसरामध्ये वाहतूक कोंडी देखील निर्माण झाली आहे. पालिका आपत्कालीन टीम घटनास्थळी दाखल झाली असून मदतकार्य सुरु आहे.