Sambhajinagar Accident : साईबाबांच्या दर्शनाची इच्छा अपूर्ण राहिली! शिर्डीला पोहचण्यापूर्वीच काळाचा घाला, 3 भाविकांचा मृत्यू

Sambhajinagar  : छत्रपती संभाजीनगरमध्ये भीषण अपघाताची घटना घडली आहे. ट्रॅक्टरला जीपने पाठीमागून जोरदार धडक दिली. या भीषण अपघातामध्ये ३ भाविकांचा जागीच मृत्यू झाला तर १२ जण जखमी झाले आहेत. साईबाबांच्या दर्शनासाठी शिर्डीला जात असताना हा अपघात झाला. जखमी झालेल्या भाविकांना उपचारासाठी रुग्णालयामध्ये दाखल करण्यात आले आहे. संभाजीनगर पोलिसांकडून अपघाताचा तपास सुरू आहे.

या भीषण अपघातामध्ये वैद्विक ऊर्फ नंदन श्यामशेट्टी (६ महिने), अक्षिता गडकुनुरी (२१ वर्षे) आणि प्रेमलता श्यामशेट्टी (५८ वर्षे) या तिघांचा दुर्दैवी मृत्यू झाला आहे. तर १२ जण जखमी झाले आहे. जखमींमधील अनेकांची प्रकृती गंभीर आहे. जखमींवर नजीकच्या रुग्णालयामध्ये उपचार सुरू आहेत. हैदराबाद येथील १४ भाविक मंगळवारी शिर्डी येथे आले होते.

हे सर्वजण छत्रपती संभाजीनगर येथे आले होते. बुधवारी सकाळी जीपमधून वेरूळ लेण्या पाहून आणि घृष्णेश्वराचे दर्शन घेऊन गंगापूरमार्गे शिर्डीला जात होते. शिर्डीला जात असताना रात्री १० वाजताच्या सुमारास तांबूळगोटा फाटा येथे महालगावकडे ऊस घेऊन जाणाऱ्या ट्रॅक्टरच्या ट्रॉलीला या भाविकांच्या जीपने पाठीमागून धडक दिली. हा अपघात एवढा भीषण होता की कारचा चक्काचूर झाला.