Ahilyanagar : जामखेडमध्ये निलेश घायवळच्या कानशिलात लगावणारा गुंड सागर मोहळकर याच्यावर गोळीबार.

Ahilyanagar : अहिल्यानगर जिल्ह्यात टोळीयुद्धाचा भडका उडालेला बघायला मिळत आहे. कुख्यात गुंड निलेश घायवळ याच्या कानशिलात लगावणाऱ्या गुंड सागर मोहळकर याच्यावर गोळीबार झाल्याची धक्कादायक घटना समोर आली आहे. एका कुस्तीच्या कार्यक्रमात निलेश घायवळ याच्यावर सागर मोहळकर याने हल्ला केला होता. त्याने निलेश घायवळच्या कानशिलात लगावल्याने तो चर्चेत आला होता. त्याच सागर मोहळकर याच्यावर अज्ञात आरोपींकडून गोळीबार झाल्याचा धक्कादायक प्रकार समोर आला आहे. सध्या सागर मोहळकरची प्रकृती गंभीर असल्याची माहिती आहे. त्याच्यावर रुग्णालयात उपचार सुरु आहेत. या घटनेमुळे जामखेडमध्ये खळबळ उडाली आहे.

जामखेड शहरातील न्युरानी कॉलनी बुधवारी सायंकाळी अक्षरश गोळीबाराच्या आवाजाने दणाणून गेली. कुख्यात गुंड सागर मोहळकर याच्यावर मोटारसायकलवरून आलेल्या अज्ञात हल्लेखोराने थेट सात राऊंड फायर केल्याची धक्कादायक घटना घडली. यापैकी चार गोळ्या मोहळकरच्या अंगात घुसल्याची माहिती डॉक्टरांनी दिली आहे. त्याची प्रकृती गंभीर आहे.
सायंकाळी साडेसातच्या सुमारास ही थरारक घटना घडली. गोळीबारानंतर परिसरात एकच खळबळ उडाली. नागरिकांमध्ये भीतीचे वातावरण पसरले असून न्युरानी कॉलनी काही काळ तणावाखाली होती.

सागर मोहळकर हा नुकताच कारागृहातून बाहेर
सागर मोहळकर हा नुकताच नाशिक मध्यवर्ती कारागृहातून जामीनावर बाहेर आला होता. त्याच्यावर यापूर्वी ३०७ सह विविध गंभीर गुन्हे दाखल असल्याची माहिती पोलिसांकडून मिळाली आहे. दोन दिवसांपूर्वीच त्याच्या वडिलांनी त्याच्याविरोधात जामखेड पोलीस ठाण्यात एनसी दाखल केली होती. मोहळकर हा नशेच्या आहारी गेलेला असून जामखेड परिसरात त्याची दहशत असल्याची चर्चा आहे.

उपचारांसाठी नगरला हलवले
गोळीबारानंतर जामखेड पोलिसांनी तात्काळ मोहळकरला ग्रामीण रुग्णालयात दाखल केले. त्यानंतर शहरातील खासगी रुग्णालयात प्राथमिक उपचार करून पुढील उपचारासाठी नगर येथे हलविण्यात आले. डॉक्टरांच्या माहितीनुसार त्याच्या शरीरात चार गोळ्या अडकल्या असून परिस्थिती चिंताजनक आहे.

हल्लेखोर फरार, पोलिसांकडून शोध सुरु
गोळीबार करणारे हल्लेखोर घटनेनंतर पसार झाले आहेत. पोलिसांनी परिसर सील करून तपास सुरू केला आहे. सीसीटीव्ही फुटेज आणि स्थानिकांकडून माहिती घेतली जात आहे. दवाखान्याबाहेर मोठ्या प्रमाणात गर्दी जमल्याने काही काळ तणावपूर्ण वातावरण निर्माण झाले होते. या थरारक गोळीबारामुळे जामखेड पुन्हा एकदा हादरले असून गुन्हेगारीच्या प्रश्नावर पोलिसांसमोर मोठे आव्हान उभे राहिले आहे. याप्रकरणी पुढील तपास जामखेड पोलीस करत आहेत.