Pune News : कात्रज प्राणिसंग्रहालयातून बिबट्या पसार ? बिबट्या उद्यानात सापडल्याची प्रशासनाची माहिती

कात्रज येथील प्राणिसंग्रहालय पर्यटकांचे प्रमुख आकर्षण आहे. या प्राणिसंग्रहालयात पश्चिम घाटातील जैवविविधता दर्शविणारे सस्तन प्राणी, पक्षी आणि सरपटणारे प्राणी अशा एकूण ६६ जातींचे प्राणी आहेत. प्राणिसंग्रहालयातील खंदक हे मोठे आणि नैसर्गिक आभासाचे आहेत. सध्या असलेल्या प्राण्यांमध्ये आशियाई सिंह, जंगली मांजर, लेपर्ड कट, जाएंट स्क्विरल, पिसोरी हरीण, खोकड, जंगली कुत्रे, तरस, लायन टेल मकाक या प्राण्यांचा समावेश आहे. तसेच याशिवाय वाघ, हत्ती, गवा, अस्वल, लांडगा, कोल्हा, शेकरू आदी प्राणीही येथे आहेत. काही दिवसांपूर्वी त्यामध्ये चौशिंगे, तरस आणि बिबट्या या प्राण्यांची भर पडली होती. या प्राणिसंग्रहालयात चार बिबटे असून, त्यातील तीन मादी आहेत. यातील नर जातीचा बिबट्या पिंजऱ्यातून पसार झाल्याचे सोमवारी पुढे आले. या बिबट्याला विलगीकरण कक्षातील पिंजऱ्यात ठेवले होते. त्याला हंपी येथीलअटलबिहारी वाजपेयी प्राणिसंग्रहालयातून घेण्यात आले होते. दरम्यान, यासंदर्भात महापालिकेचे अतिरिक्त आयुक्त विकास ढाकणे यांनी मात्र बिबट्या पसार झाला नसल्याचे सांगितले.