Pune Crime : पुण्यात कायदा व सुव्यवस्थेचे धिंडवडे! पुण्यात दोन गटात तुंबळ हाणामारी, राड्यात एकाचा मृत्यू

Pune Crime : पुण्यात घरगुती कारणावरून दोन गटांमध्ये झालेल्या वादात एका तडीपार गुंडाचा खून करण्यात आला. तर अन्य दोघेजण गंभीर जखमी झाले. ही घटना वानवडी परिसरातील सय्यदनगरमध्ये गुरुवारी (ता. १०) रात्री सुमारास घडली.

आजीम वजीर शेख ऊर्फ अंत्या (वय ३५, रा. सय्यदनगर) असे खून झालेल्या तरुणाचे नाव आहे. आजीम याला पोलिसांनी शहरातून तडीपार केले होते. तरीही तो वानवडी पोलिस ठाण्याच्या हद्दीतील सय्यदनगर परिसरात आला होता..

गुन्हे शाखेचे पोलिस उपायुक्त अमोल झेंडे यांनी दिलेल्या माहितीनुसार, दोन गटांतील तरुण एकमेकांचे नातेवाईक आहेत. काही दिवसांपूर्वी लहान मुलांमध्ये भांडण झाले होते. तो वाद मिटविण्यासाठी नातेवाईक रात्री साडेआठ वाजण्याच्या सुमारास जमले होते.

त्यावेळी तडीपार गुंड आजीम शेख हा त्याठिकाणी आला. त्याने अरेरावीची भाषा वापरल्यामुळे दोन गटांमध्ये हाणामारी सुरू झाली. त्यात सात-आठ तरुणांनी आजीम शेख याच्यावर हत्याराने वार केले. त्यात गंभीर जखमी झाल्यामुळे त्याचा मृत्यू झाला.

तर अन्य दोघा तरुणांच्या हातावर वार केल्यामुळे ते जखमी झाले आहेत. या घटनेची माहिती मिळताच गुन्हे शाखेचे पोलिस उपायुक्त अमोल झेंडे, सहायक पोलिस आयुक्त सतीश गोवेकर यांच्यासह अन्य पोलिस अधिकारी घटनास्थळी दाखल झाले