Pune : पुण्यात 6 वर्षांच्या चिमुरडीवर अत्याचार करून हत्या; आरोपीची फाशीची शिक्षा हायकोर्टाकडून रद्द

Pune : अवघ्या सहा वर्षांच्या चिमुरडीवर अत्याचार करुन तिची निर्घृण हत्या केल्याप्रकरणी पुण्यातील विशेष पोक्सो न्यायालयाने तरुणाला ठोठावलेली फाशीची शिक्षा मुंबई उच्च न्यायालयाने मंगळवारी काही कायदेशीर बाबींची पूर्तता नसल्याच्या कारणावरून रद्दबातल केली. तसेच, त्या कायदेशीर बाबींची पूर्तता करून चार महिन्यांत अंतिम निकाल देण्याचा आदेश पोक्सो न्यायालयाला दिला आहे.

नेमकं काय घडलं होतं?
पुणे जिल्ह्यातील मावळ तालुक्यातील जिल्हा परिषद शाळेजवळच्या झुडपांमध्ये ३ ऑगस्ट २०२२ रोजी पीडित मुलीचं शव सापडलं होतं. त्यानंतर पुणे ग्रामीण पोलिसांनी तपास केला असता, या मुलीवर अत्याचार करून तिची हत्या झाल्याचे उघडकीस आले.

आरोपी तरुणाला आईची मदत
मिळालेल्या माहितीवरून, पोलिसांनी पीडितेच्या घराजवळ राहणाऱ्या २४ वर्षीय तेजस उर्फ दादा महिपती दळवी याला अटक केली. तो एका फार्म हाऊसवर कामाला होता आणि त्याला अश्लाघ्य चित्रफिती पाहण्याची सवय होती, असे पोलिसांच्या तपासात समोर आले होते. तसेच, घडलेल्या गुन्ह्यात तेजसला त्याच्या आईने मदत केल्याचेही समोर आले.

पोक्सो न्यायालयाने याप्रकरणी खटल्याच्या सुनावणीअंती २२ मार्च २०२४ रोजी तेजसला फाशीची तर, त्याच्या आईला सात वर्षांची शिक्षा ठोठावली. त्यानंतर दोघांनीही शिक्षेविरोधात उच्च न्यायालयात अपील केले, तर तेजसची फाशीची शिक्षा कायम होण्यासाठी राज्य सरकारने याचिका केली.

कोर्टाने काय सांगितलं?
‘खटल्यात रासायनिक विश्लेषणाच्या १२ अहवालांचा आधार घेण्यात आला. मात्र, आम्हाला विश्लेषकाची उलटतपासणी करता यावी यासाठी त्याला न्यायालयात पाचारणच करण्यात आले नाही. शिवाय कलम ३१३ अन्वये न्यायालयाने आमचे जबाब स्वतंत्र नोंदवले नाहीत. आम्हाला एकत्रित प्रश्न विचारून उत्तरे लिहिण्यात आली. या दोन्ही कारणांमुळे खटल्यात कायदेशीर प्रक्रियेचा भंग झाला आहे’, असे म्हणत दोन्ही दोषींनी ॲड. रिबेका गोन्साल्विझ यांच्यामार्फत अर्जही केला होता.

तसेच ‘विश्लेषकाची उलटतपासणी आणि आमचे स्वतंत्र जबाब याविषयी संधी द्यावी आणि पोक्सो न्यायालयाचा निर्णय रद्द करावा,’ अशी विनंतीही त्यात होती. याविषयीच्या सुनावणीअंती न्या. मनीष पितळे व न्या. श्रीराम शिरसाट यांच्या खंडपीठाने हा निर्णय दिला आणि दोघांच्या अपिलांसह सरकारची याचिका निकाली काढली.