Pune : सतीश ‌वाघ खून प्रकरणात: गुन्हे शाखेकडून आरोपपत्र; अक्षय जावळकर, मोहिनी वाघ मुख्य सूत्रधार

सतीश तात्याबा वाघ (वय ५८, रा. फुरसुंगी, हडपसर-सासवड रस्ता) यांचे अपहरण करुन निर्घृण खून करण्यात आल्याची घटना ९ डिसेंबर २०२४ राेजी घडली होती. नेहमीप्रमाणे सकाळी वाघ फिरायाल निघाले होते. सासवड रस्त्यावर त्यांना धमकावून त्यांचे मोटारीतून अपहरण करण्यात आले होते. उरळी कांचन परिसरातील शिंदवणे घाटात वाघ यांच्यावर शस्त्राने तब्बल ७२ वार करून खून करण्यात आला होता. त्यांचा मृतदेह घाटात फेकून आरोपी पसार झाले होते. याप्रकरणात सतीश वाघ यांची पत्नी मोहिनी, अक्षय जावळकर,आतिश जाधव,पवन शर्मा, नवनाथ गुरसाळे, विकास शिंदे यांना अटक करण्यात आली होती. वाघ यांच्या मुलाने याबाबत हडपसर पोलीस ठाण्यात फिर्याद दिली होती.

याप्रकरणात अटक करण्यात आलेल्या सहा आरोपींविरुद्ध गुन्हे शाखेने एक हजार पानांचे आरोपपत्र लष्कर न्यायालयात दाखल केले. माेहिनी वाघ आणि अक्षय जावळकर हे २०१३ मध्ये एकमेकांच्या संपर्कात आले. अक्षय हा वाघ यांच्या खोलीत भाडेतत्त्वावर राहत होता. अक्षयने वाघ यांच्या मुलाला महाविद्यालयात प्रवेश मिळवून देण्यासाठी प्रयत्न केले होते. अक्षय आणि पत्नी मोहिनी यांच्यात अनैतिक संबंध निर्माण झाले. सतीश वाघ यांना संशय आला होता. त्यामुळे त्यांनी पत्नी माेहिनी हिच्याकडील आर्थिक व्यवहार काढून घेतले. त्यानंतर अक्षय याने दुसरीकडे घर घेतले. अक्षय आणि मोहिनी यांनी संगनमत करुन वाघ यांचा खून करण्याचा कट रचला.

याप्रकरणात पोलिसांनी न्यायवैद्यकीय पुरावे गोळा केले, तसेच आरोपी, फिर्यादी, साक्षीदारांचे जबाब नोंदविले आहेत. वाघ यांचा मोबाइल संच, गुन्ह्यात वापरलेली मोटार, शस्त्रे जप्त करण्यात आली होती. पोलीस आयुक्त अमितेश कुमार, अतिरिक्त आयुक्त शैलेश बलकवडे, उपायुक्त निखील पिंगळे यांच्या मार्गदर्शनाखाली अमली पदार्थ विरोधी पथकाने वरिष्ठ पोलीस निरीक्षक सुदर्शन गायकवाड आणि पथकाने याप्रकरणाचा तपास करुन आरोपपत्र दाखल केले.

पती सतीश वाघ यांचा अनैतिक संबंधातील अडसर दूर करण्यासाठी मोहिनीने वर्षभरापूर्वी एका मांत्रिकाची भेट घेतली होती. वाघ यांच्यावर जादूटोणा करण्यास तिने मांत्रिकाला सांगितले होते. खून करण्यापूर्वी वर्षभरापासून आरोपींनी वाघ यांच्यावर पाळत ठेवली होती. आरोपी अक्षयने वाघ यांच्या खून करण्याची सुपारी सराइत गुन्हेगार पवन शर्मा, नवनाथ गुरसाळे आणि विकास शिंदे यांना दिली होती. तिघांनी त्यांचा खून करण्यासाठी प्रयत्न केले होते.