Pune Accident: पुण्यातील भूमकर पुलावर टँकरचा अपघात; दुर्घटनेमुळे वाहनांच्या लागल्या लांबच लांब रांगा

धायरी : साताऱ्याकडून मुंबईच्या दिशेने जाणाऱ्या महामार्गावर खोबरे तेलाने भरलेला टँकर उलटला. ही घटना संध्याकाळी चार वाजण्याच्या सुमारास घडली आहे. अपघातात कुठल्याही प्रकारची जीवित हानी झालेली नाही. परंतु रस्त्यावर खोबरे तेल पसरल्याने महामार्ग मोठ्या प्रमाणावर निसरडा झाल्याने, महामार्गावरील वाहतूक मंदावली असून वाहनांच्या लांबच लांब रांगा लागल्या आहेत. महामार्गावरील वाहतूक संत गतीने पुढे जात आहे.

टँकर कोईमतूर तामिळनाडू येथून २४००० हजार लिटर खोबरे तेल घेऊन मुंबईच्या दिशेने जात असताना, नऱ्हे येथील भुमकर पुलावर गिअर बॉक्स निकामी झाल्याने टँकर चालकाचे टँकर वरील नियंत्रण सुटल्याने टँकर उलटला. सुदैवाने या अपघातात कुठल्याही प्रकारची जीवितहानी झाली नाही. तसेच सर्वत्र तेल पसरल्याने महामार्ग निसरडा झाला असल्याने इतर अपघात होण्याची शक्यता असल्याने सिंहगड वाहतूक विभाग व सिंहगड पोलीस वाहतूक सुरळीत करत आहेत.