Pune Accident Case : अल्पवयीन मुलाला तत्काळ जामीन देणं भोवणार? बाल न्याय मंडळाच्या सदस्यांची होणार चौकशी

आता ही चौकशी समिती या प्रकरणाची पूर्णपणे पडताळी करणार आहे. यासंदर्भातील अहवाल आयुक्त नारनवरे यांच्याकडे सादर केला जाणार आहे. त्यामुळे अल्पवयीन मुलाला जामीन तत्काळ जामीन मंजूर करणं बाल न्याय मंडळातील सदस्यांच्या चांगलंच अंगलट येण्याची शक्यता आहे.

पुण्यातील प्रसिद्ध बिल्डर विशाल अग्रवाल याच्या मुलाने सुसाट कार चालवत दोन जणांचा जीव घेतला. जेव्हा हा अपघात झाला तेव्हा अल्पवयीन मुलाने दारू ढोसली होती, असं तपासातून समोर आलं. कल्याणीनगर परिसरात घडलेल्या या घटनेमुळे संपूर्ण राज्यात संतापाची लाट उसळली.

या प्रकरणाला वाचा फुटल्यानंतर आतापर्यंत जवळपास १० जणांना अटक करण्यात आली. यामध्ये अल्पवयीन मुलाच्या कुटुंबातील काही सदस्यांसह ब्लड रिपोर्ट बदलणाऱ्या ससूनमधील दोन डॉक्टरांचा देखील समावेश आहे. सध्या पोलीस अटक करण्यात आलेल्या व्यक्तींची चौकशी करीत आहेत.