पुणे: "तुझ्याशी लग्न करणार नाही कारण" प्रियकराच्या एका नकारामुळे आणि दुसऱ्या मुलीसोबतच्या चॅटिंगच्या वादातून २२ वर्षीय तरुणीचा टोकाचा निर्णय

पुणे: खेड तालुक्यातून एक अत्यंत मन हेलावून टाकणारी घटना समोर आली आहे. प्रियकराने लग्नास स्पष्ट नकार दिल्यामुळे आणि तो इतर मुलींसोबत चॅटिंग करत असल्याच्या कारणावरून आलेल्या नैराश्यातून अवघ्या २२ वर्षीय तरुणीने स्वतःच्या घरी ओढणीच्या साहाय्याने गळफास घेऊन आत्महत्या केली आहे. याप्रकरणी मृत तरुणीच्या प्रियेकारावर महाळुंगे पोलीस ठाण्यात गुन्हा दाखल करण्यात आला आहे.

नेमकी घटना काय?
मिळालेल्या माहितीनुसार, साहिल बोत्रे असे आरोपी प्रियकराचे नाव आहे. साहिल याने मोनिका (वय २२, नाव बदललेले/मूळ नाव) या तरुणीला लग्नाचे आमिष दाखवून तिच्याशी जवळीक साधली होती. मात्र, काही कालावधीनंतर तो दुसऱ्या एका मुलीसोबत सतत चॅटिंग करत असल्याचे मोनिकाच्या निदर्शनास आले. जेव्हा तिने याबद्दल साहिलला विचारणा केली, तेव्हा त्याने उडवाउडवीची उत्तरे दिली.

जेव्हा मोनिकाने त्याच्याशी लग्नाबाबत विचारणा केली, तेव्हा साहिलने तिच्याशी लग्न करण्यास स्पष्ट नकार दिला. "ती माझी फक्त मैत्रीण आहे, मी तिच्याशी चॅटिंग करत आहे आणि मी तुझ्याशी लग्न करू शकत नाही, कारण आपल्या दोघांच्या लग्नाला माझ्या घरच्यांचा तीव्र विरोध आहे," असे स्पष्ट सांगत त्याने टाळाटाळ केली.

नैराश्यातून टोकाचे पाऊल
प्रियकराकडून असा अचानक नकार मिळाल्यामुळे आणि तो दुसऱ्या मुलीशी जवळिकी ठेवित असल्याच्या मानसिक धक्क्यातून मोनिका तीव्र नैराश्यात गेली. याच नैराश्यातून तिने आपल्या राहत्या घरी टोकाचे पाऊल उचलत ओढणीच्या साहाय्याने गळफास घेतला. या घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला आणि विच्छेदनासाठी पाठवला. याप्रकरणी पीडित कुटुंबाच्या तक्रारीवरून महाळुंगे पोलिसांनी आरोपी प्रियकर साहिल बोत्रे विरोधात गुन्हा दाखल केला असून, पोलीस या प्रकरणाचा अधिक सखोल तपास करत आहेत.