Nandurbar : नेट सुरु करून दे, ग्रंथालयात नेऊन अल्पवयीन विद्यार्थिनीला दाखवला अश्लील व्हिडिओ; चेअरमन अन् मुख्याध्यापिका म्हणतात...

Nandurbar : बदलापूर येथील घटनेबाबत राज्यभर संतापाची लाट उसळली होती. हे प्रकरण ताजे असतानाच नंदुरबारमध्ये एका नामांकित शाळेत पाचवीत शिकणाऱ्या १० वर्षीय मुलीला अश्लील व्हिडिओ दाखवण्याचा प्रकरण उघड झाले आहे. या प्रकरणी शाळेतील कंत्राटी सफाई कामगाराविरुद्ध गुन्हा दाखल करण्यात आला असून. त्याला अटक करण्यात आली आहे. तसेच या घटनेमुळे शाळेची बदनामी होईल म्हणून पालकांना गुन्हा दाखल करण्यासाठी मज्जाव केल्याप्रकरणी हायस्कूलचे चेअरमन व शाळेच्या मुख्याध्यापिका यांच्याविरुद्धही नंदुरबार शहर पोलीस ठाण्यात गुन्हा दाखल करण्यात आला आहे.

बदलापूर येथील एका शाळेत दोन मुलींवर लैंगिक अत्याचार घडल्याची घटना घडली होती. त्यानंतर राज्यभर त्याबाबत तीव्र पडसाद उमटले. असाच काहीसा प्रकार नंदुरबार शहरातील एका नामांकित हायस्कूलमध्ये उघड झाला आहे. या संस्थेत कंत्राटी सफाई कामगार म्हणून राजू मुन्सी (वय ५०) काम करीत होता. २७ ऑगस्ट रोजी दुपारी सव्वाअकरा वाजेदरम्यान या सफाई कर्मचाऱ्याने शाळेतील पाचवीत शिकणाऱ्या अल्पवयीन विद्यार्थिनीला ''मोबाईल मधील नेट सुरु करून दे'', असं सांगत ग्रंथालयात घेऊन जाऊन अश्लील व्हिडिओ दाखवले.

Mumbai : मालवणमध्ये पोलिसांवर गुंड थुंकले, शिव्या दिल्या, गृहमंत्र्यांना लाज वाटली पाहिजे, संजय राऊतांनी सुनावले

त्यानंतर विद्यार्थिनी घाबरून त्या ठिकाणाहून पळून गेली. तिने घडलेली हकीकत रात्री पालकांना सांगितली. त्यानंतर पालकांनी दुसऱ्या दिवशी नंदुरबार शहर पोलीस ठाणे गाठत फिर्याद दाखल केली. पीडितेच्या आईच्या फिर्यादीवरून कंत्राटी सफाई कामगार राजू मुन्सी याच्याविरुद्ध भा.न्या.सं. २०२३ चे कलम ७५ (३) सह लैगिंक अपराधापासून बालकांचे संरक्षण अधिनियम २०१२चे कलम प्रमाणे गुन्हा दाखल करण्यात आला आहे. संस्थेत संशयित आरोपी राजू मुन्सी याला अटक करण्यात आली. पोलीस ठाण्यात असताना संशयित आरोपी याच्या छातीत दुखत असल्याने त्याला रुग्णालयात नेण्यात आले.

मुख्याध्यापिका आणि चेअरमनविरुद्ध गुन्हा दाखल

नंदुरबार येथील एका नामांकित हायस्कूलमध्ये ही घटना घडल्यानंतर पीडित मुलीच्या पालकांनी संबंधित बाब शाळा व्यवस्थापनाच्या निदर्शनास आणून दिली. मात्र शाळेने तात्काळ कारवाई न करता फिर्याद दाखल केल्यास शाळेची तसेच मुलीची बदनामी होईल असे सांगत फिर्याद देण्यास मज्जाव केला. त्यामुळे नंदुरबार शहर पोलीस ठाण्यात संस्थेचे चेअरमन डॉक्टर योगेश देसाई तसेच मुख्याध्यापिका सुष्मा शहा यांच्याविरुद्धही गुन्हा दाखल करण्यात आला आहे. संबंधित घटनेची माहिती मिळताच अनेक पालक पोलीस ठाणे परिसरात दाखल झाले.

सफाई कर्मचाऱ्याला कामावरून काढले

विद्यार्थिनीला अश्लील व्हिडिओ दाखवल्याप्रकरणी त्याला शाळा व्यवस्थापनाने कामावरून काढले आहे. शाळा परिसर मोठा असल्याने साफसफाई करण्यासाठी कंत्राटी सफाई कामगाराची नियुक्ती करण्यात आली होती. या घटनेच्या कायदेशीर कारवाईसाठी संस्थेतर्फे पूर्ण सहकार्य करण्यात येणार असल्याचे मुख्याध्यापिका सुष्मा शहा यांनी सांगितले.