Nagpur-Wardha Accident News : नागपूर- वर्धा महामार्गावर 3 बसेसचा विचित्र अपघात; 15 ते 18 प्रवाशी जखमी

Bus Accident News: नागपूर- वर्धा महामार्गावर जंगलपूर शिवारात तीन एसटी बसेसचा विचित्र अपघात झालेला आहे. नागपूरवरून वर्धाच्या दिशेने जाणाऱ्या तिन्ही एसटी बस एकमेकांना धडकल्या आणि त्यामुळे हा अपघात झाला. या अपघातात 15 ते 18 प्रवासी जखमी झाले असून त्यांना सेलू येथील प्राथमिक आरोग्य केंद्रात उपचारासाठी नेण्यात आले आहे.

घटनास्थळावरून मिळालेल्या माहितीप्रमाणे, नागपूरपासून वर्ध्याच्या दिशेने जाणारी पहिली एसटी बस रस्त्यावर पंचर झाल्यामुळे उभी होती. पाठीमागून आलेली दुसरी एसटी बस त्या ठिकाणी थांबून पहिल्या बसच्या प्रवाशांना घेत असताना पाठीमागून आलेल्या तिसऱ्या एसटी बसने दोन्ही बसेसला  जोरदार धडक दिली आणि त्यामुळे हा अपघात घडला. अपघातानंतर नागपूर-वर्धा महामार्गावरची वाहतूक काही काळासाठी थांबली होती. सध्या पोलीस घटनास्थळी पोहोचले आहेत. 

गोंदिया कोहमारा मार्गावर भीषण अपघात; एकाचा मृत्यू

गोंदिया वरून नागपूरकडे जाणाऱ्या कारचा गोंदिया-कोहमारा मार्गावर अपघात झाला असून हा अपघात इतका भीषण होता की 24 वर्षीय चालकाचा जागीच मृत्यू झाला आहे. याच कारमध्ये असलेले आणखी 4 जण गंभीर जखमी झाल्याची माहिती समोर आली आहे।महमद शेख असे मृत चालकाचे नाव आहे।अपघातग्रस्त कार गोंदिया वरून नागपूरकडे निघाली होती,दरम्यान, कोहमारा मार्गावरील भुसारीटोलाजवळ कार अनियंत्रित झाल्याने झाडावर आदळल्याचे प्रथम दर्शनी सांगण्यात येत आहे.