Mumbai : राज्यात आजही मुसळधार! काही भागांत रेड, तर कुठे ऑरेंज अलर्ट जारी, वाचा वेदर रिपोर्ट

 

Mumbai  : पावसाचा जोर मंगळवारी वाढल्यानंतर मुंबईला देण्यात आलेले पावसाचे इशारे सातत्याने अद्ययावत करण्यात आले. त्यातच बुधवारी संध्याकाळनंतर पुन्हा पावसाचा जोर वाढल्याने सायं. ५.३० नंतर मुंबईसाठी रेड अलर्ट देण्यात आला. गुरुवारी सकाळी ८.३०पर्यंत हा रेड अलर्ट जारी असून, गुरुवारी दिवसभरासाठी ऑरेंज अलर्ट देण्यात आला आहे. चेंबूर, मानखुर्द भागांमध्ये पावसाचा जोर सायंकाळी अधिक होता, तर नवी मुंबईमध्ये दुपारी अडीच ते आठ-साडे आठ वाजेपर्यंत पावसाचा जोर अधिक होता.

मंगळवार सकाळी ८.३० ते बुधवार सकाळी ८.३० या कालावधीत कुलाबा येथे ४१.४ मिमी, तर सांताक्रूझ येथे ७४.२ मिमी पावसाची नोंद झाली. त्यानंतर दिवसभरात अधूनमधून पावसाच्या सरी कोसळल्या. मात्र, संध्याकाळनंतर पावसाचा जोर अधिक वाढला. सकाळी ८.३० ते सायं. ५.३०पर्यंत कुलाबा येथे १५, तर सांताक्रूझ येथे १६ मिमी पावसाची नोंद झाली. त्यानंतर मुंबईत पावसाचा जोर वाढायला सुरुवात झाली. उत्तर कोकण ते दक्षिण बांगलादेश या पट्ट्यात ढगांची द्रोणीय स्थिती असल्याने, मुंबई आणि महामुंबई परिसराला ऑरेंज अलर्ट देण्यात होता, हा इशारा अद्ययावत करून रेड अलर्ट करण्यात आला. मुंबईत ठिकठिकाणी पाणीही साचायला सुरुवात झाली. मुंबईत सायंकाळनंतर सुरू झालेला पावसाचा जोर रात्री उशिरापर्यंत कायम होता.

PM Modi Pune Visit: पुणेकरांसाठी मोठी बातमी! PM मोदींच्या दौऱ्यामुळे आज वाहतुकीत बदल, 'हे' रस्ते राहणार बंद

गुरुवारी पहाटे पुन्हा पावसाचा जोर वाढण्याची शक्यता भारतीय हवामान विभागाने वर्तवलेली असल्याने गुरुवारसाठीही ऑरेंज अलर्ट देण्यात आला आहे. मुंबई, ठाणे येथे गुरुवारसाठी ऑरेंज अलर्ट दिला असून, पालघर येथे रेड अलर्ट देण्यात आला आहे. गुरुवारी मुंबई, ठाणे, रायगड या जिल्ह्यांमध्ये मुसळधार ते अतिमुसळधार पावसाची शक्यता आहे. पालघरमध्ये अतितीव्र मुसळधार पावसाची शक्यता आहे. मध्य महाराष्ट्रात पुणे, धुळे, नंदुरबार जिल्ह्यांनाही ऑरेंज अलर्ट देण्यात आला आहे, तर नाशिक जिल्ह्यात रेड अलर्ट देण्यात आला आहे.

पाच तासांत २०० मिमी पाऊस
सायंकाळी पाच ते दहा या पाच तासांत कुलाबा अग्निशमन दल केंद्र येथे १०४ मिमी पावसाची नोंद झाली. तर वडाळा अग्निशमन दल केंद्र येथे १४६.५६ मिलीमीटर पावसाची नोंद झाली. त्याचवेळी पूर्व उपनगरामधील काही केंद्रावर पाच तासांत २०० मिमी पावसाची नोंद झाली आहे. शहरामध्ये सरासरी पाऊस ८७.७९ मिमी पाऊस पडला. उपनगरांमध्ये के पूर्व विभाग कार्यालय येथे १४४.२६ मिमी, मालपा डोंगरी येथे १६६.६० मिमी पाऊस नोंदला गेला. पश्चिम उपनगरांमध्ये विविध ठिकाणी पाच तासांमध्ये मुसळधार पावसाची नोंद झाली. सरासरी पाऊस ९५.५७ मिमी नोंदला गेला. पूर्व उपनगरांमध्ये तुर्भे येथे २१८, तर एम पूर्व विभागात नूतन विद्यामंदिर केंद्रावर २७५ मिमी पाऊस नोंदला गेला. एस विभागात टागोरनगर येथे २३४ मिमी, पवई महापालिका शाळेच्या केंद्रावर २७४ मिमी पावसाची नोंद झाली. पावसाचा सर्वाधिक फटका पूर्व उपनगरांना बसल्याचे महापालिकेकडून सांगण्यात आले. पूर्व उपनगरांमध्ये १६७.४८ मिमी सरासरी पावसाची पाच तासांमध्ये नोंद झाली.