Maharashtra Politics News : मालेगावमध्ये जाहीर सभा! दादा भुसेंच्या होम ग्राऊंडवर ठाकरेंची तोफ धडाडणार; राज ठाकरेंचा घेणार समाचार?

Udhav Thackeray Rally in Malegaon: शिवसेनेत उभी फुट पडल्यानंतर उद्धव ठाकरे हे महाराष्ट्रभर दौरा करीत आहेत. ज्यामधील नुकतीच खेडची सभा झाल्यानंतर उद्धव ठाकरे आज मालेगावमध्ये सभा घेत आहेत. उत्तर महाराष्ट्रासाठी ही सभा असणार आहे. उद्धव ठाकरेंच्या या सभेची ठाकरे गटाकडून जोरदार तयारी करण्यात आली आहे.

तर दुसरीकडे भारत राष्ट्र समितीचे अध्यक्ष आणि तेलंगणाचे मुख्यमंत्री चंद्रशेखर राव यांची नांदेडमध्ये जाहीर सभा होणार आहे. त्यामुळे या दोन सभांनी आजचा दिवस गाजणार असल्याचे दिसत आहे.

खेडमधील जोरदार सभेनंतर ठाकरे गटाचे नेते उद्धव ठाकरे यांची नाशिक जिल्ह्यातील मालेगावमध्ये आज जाहीर सभा होत आहे. उद्धव ठाकरे नाशिकमध्ये येत असल्याने शिवसैनिकांमध्ये प्रचंड उत्साह संचारला असून नाशिकसह मालेगावचे वातावरण भगवामय झाल्याचे चित्र आहे.

मालेगाव मतदारसंघातून मंत्री दादा भुसे हे निवडून आले आहेत. सध्या ते नाशिकचे पालकमंत्री असून एका मंत्रीपदाचा कार्यभारही पाहत आहेत. अशातच मालेगावमधून भाजपचे अद्वय हिरे यांनी शिवसेना ठाकरे गटात प्रवेश करत भाजपसह  शिवसेना शिंदे गटाला चांगलाच धक्का दिला. त्यामुळे आजच्या सभेतून अद्वय हिरे जोरदार शक्तिप्रदर्शन करत दादा भूसेंना टक्कर देणार असल्याचे दिसत आहे.

तर दुसरीकडे तेलंगणाचे मुख्यमंत्री के चंद्रशेखर राव यांची जाहीर सभा नांदेड जिल्ह्यातील लोहा तालुक्यात होणार आहे. राष्ट्रवादी काँग्रेसचे यशपाल भिंगे, बहुजन आघाडीचे सुरेश गायकवाड, राष्ट्रवादीचे माजी आमदार शंकर अण्णा धोंडगे यांचा भारतीय राष्ट्रीय समितीमध्ये चंद्रशेखर राव यांच्या हस्ते जाहीर पक्ष प्रवेश होणार आहे.