Jejuri : खंडोबा गडाच्या पायथ्याशी गोंधळ; चपला ठेवण्याच्या किरकोळ वादातून भाविकांचा दुकानदारावर जीवघेणा हल्ला, दुकानाची तोडफोड

जेजुरी : संपूर्ण महाराष्ट्राचे कुलदैवत असलेल्या जेजुरी येथील खंडोबा गडाच्या पायथ्याशी शनिवारी दुपारी एक धक्कादायक घटना घडली. किरकोळ वादातून संतप्त भाविकांच्या टोळक्याने भंडार-खोबरे विक्री करणाऱ्या दुकानदारावर हल्ला करत दुकानाची मोठ्या प्रमाणात तोडफोड केली.

दुपारी साडेतीनच्या सुमारास घडलेल्या या घटनेत दुकानदार महादेव श्रीरंग वाघमारे यांना पाच ते सहा जणांनी लाथा-बुक्क्यांनी बेदम मारहाण केली. हल्लेखोरांनी काठीने डोक्यात प्रहार केल्याने वाघमारे यांच्या डोक्याला गंभीर दुखापत झाली. यानंतर दुकानातील साहित्याची नासधूस करत परिसरात दहशत निर्माण करण्यात आली.

Vadhavan Airport : मुंबईजवळ समुद्रातील पहिलं विमानतळ उभारणार; मुख्यमंत्र्यांची मोठी घोषणा, पण केंद्राकडे प्रस्ताव अद्याप का नाही?

याबाबत मिळालेल्या माहितीनुसार, दुपारी तीनच्या सुमारास काही भाविक गडावर दर्शनासाठी जात असताना दुकानासमोर चप्पल ठेवण्याच्या कारणावरून दुकानदार व भाविकांमध्ये वाद झाला. हा वाद तात्पुरता शांत झाला असला तरी दर्शन करून परतल्यानंतर पुन्हा पेटला आणि त्याचे रूपांतर हिंसाचारात झाले. संतप्त भाविकांनी हातात दांडके घेऊन दुकानाची तोडफोड केली.

त्या वेळी दुकानात काम करणारे पाच कर्मचारी घाबरून शेजारील घरात जाऊन दरवाजा बंद करून लपले. हल्लेखोरांनी दरवाजा फोडण्याचा प्रयत्न करत लाथा मारल्या तसेच लाकडी दांडक्याने प्रहार केला. मात्र दरवाजा न तुटल्याने आत लपलेल्या कामगारांचा बचाव झाला.

या घटनेनंतरही जेजुरी पोलीस ठाण्यात उशिरापर्यंत कोणतीही तक्रार दाखल झालेली नव्हती, अशी माहिती पोलिसांनी दिली. या प्रकारामुळे खंडोबा गड परिसरातील सुरक्षिततेचा प्रश्न पुन्हा ऐरणीवर आला आहे.