IND vs SA : नरेंद्र मोदी स्टेडियममध्ये 2023 वर्ल्ड कप फायनलनंतर पुन्हा पराभव, दक्षिण आफ्रिकेचा 76 धावांनी विजय

IND vs SA Super 8 South Africa won by 76 runsImage Credit source: Social Media and Bcci X Account

आयसीसी टी 20I वर्ल्ड कप 2026 स्पर्धेत टीम इंडियाला सूर्यकुमार यादव याच्या नेतृत्वात पहिल्या पराभवाचा सामना करावा लागला आहे. भारताने साखळी फेरीत चारही सामने जिंकले होते. त्यामुळे टीम इंडिया सुपर 8 फेरीतही सामना जिंकून सलग आणि एकूण पाचवा विजय मिळवेल असा विश्वास चाहत्यांना होता. मात्र दक्षिण आफ्रिकेने अहमदाबादमधील नरेंद्र मोदी स्टेडियममध्ये टीम इंडियाची विजयी घोडदौडीला ब्रेक लावला. दक्षिण आफ्रिकेने यासह साखळी फेरीनंतर सुपर 8 मध्येही विजयी सलामी दिली. दक्षिण आफ्रिकेचा हा टी 20I वर्ल्ड कपच्या 10 व्या पर्वातील सलग आणि एकूण पाचवा विजय ठरला. दक्षिण आफ्रिकेने या विजयासह उपांत्य फेरीच्या दिशेने एक पाऊल पुढे टाकलं आहे.

सामन्यात काय झालं?

एडन मार्करम याने टॉस जिंकून बॅटिंगचा निर्णय घेतला. जसप्रीत बुमराह आणि अर्शदीप सिंह या जोडीने दक्षिण आफ्रिकेला झटपट 3 झटके दिले. त्यामुळे दक्षिण आफ्रिकेची 3 आऊट 20 अशी स्थिती झाली होती. मात्र त्यानंतर दक्षिण आफ्रिकेच्या त्रिकुटाने धमााका केला. डेवाल्ड ब्रेव्हीस (45), डेव्हीड मिलर (63) आणि ट्रिस्टन स्टब्स या (44*) त्रिकुटाने केलेल्या वादळी खेळीच्या जोरावर दक्षिण आफ्रिकेने 20 ओव्हरमध्ये 7 विकेट्स गमावून 187 धावा केल्या. त्यामुळे टीम इंडियाला 188 धावांचं आव्हान मिळालं. मात्र दक्षिण आफ्रिकेच्या गोलंदाजांसमोर भारताला 20 ओव्हरही खेळता आलं नाही. दक्षिण आफ्रिकेने भारताला 18.5 ओव्हरमध्ये 111 रन्सवर गुंडाळलं. दक्षिण आफ्रिकेने यासह हा सामना 76 धावांनी आपल्या नावावर केला.

शिवम दुबेची एकाकी झुंज, इतर फलंदाज ढेर

टीम इंडियासाठी एकट्या शिवम दुबे याने झुंज दिली. शिवमने सर्वाधिक 42 धावा केल्या. मात्र दुबे व्यतिरिक्त एकालाही 20 पार मजल मारता आली नाही. टीम इंडियाच्या इतर फलंदाजांनी दक्षिण आफ्रिकेसमोर गुडघे टेकले. दक्षिण आफ्रिकेसाठी मार्को यान्सेन याने सर्वाधिक 4 विकेट्स मिळवल्या. तर केशव महाराज याने एकाच ओव्हरमध्ये 3 विकेट्स घेत कमाल केली. कॉर्बिन बॉश याने दोघांना मैदानाबाहेरचा रस्ता दाखवला. तर कॅप्टन एडन मार्करम याने 1 विकेट मिळवली.

टीम इंडियाचा टी 20i वर्ल्ड कप 2026 मधील पहिला पराभव

South Africa win by 76 runs in Ahmedabad. #TeamIndia set their sights on a turnaround in the next game.

Scorecard ▶️ https://t.co/ZE8J4fF18z #T20WorldCup | #MenInBlue | #INDvSA pic.twitter.com/xBIBwjEEmF

— BCCI (@BCCI) February 22, 2026

टीम इंडिया अहमदाबादमध्ये पुन्हा अपयशी

दरम्यान टीम इंडियाला आयसीसी स्पर्धेत पुन्हा एकदा अहमदाबादच्या नरेंद्र मोदी स्टेडियममध्ये पराभूत व्हावं लागलंय. भारताला याच मैदानात 19 नोव्हेंबर 2023 रोजी ऑस्ट्रेलिया विरुद्ध वनडे वर्ल्ड कप फायनलमध्ये पराभवाचा सामना करावा लागला होता. त्यानंतर टीम इंडियाने आयसीसी स्पर्धेतील सर्व सामने जिंकले होते. मात्र याच मैदानात टीम इंडियाच्या आयसीसी स्पर्धेतील विजयाची साखळी तुटली आहे.