IND vs SA: तीन वेळा शून्यावर बाद झाल्यानंतर अभिषेक शर्माला वगळणार का? सुपर 8 फेरीपूर्वी कोच म्हणाला..

टी20 वर्ल्डकप 2026 स्पर्धेत सुपर 8 फेरीचा थरार रंगणार आहे. उपांत्य फेरीत स्थान मिळावायचं असेल तर चांगली कामगिरी करणं भाग आहे. अन्यथा स्पर्धेतील आव्हान संपुष्टात येईल. असं असताना भारताचा पहिलाच सामना दक्षिण अफ्रिकेशी होणार आहे. दक्षिण अफ्रिकेचा संघाशी लढत वाटते तितकी सोपी नाही. त्यामुळे या सामन्यात भारताला ताकही फुंकून प्यावं लागणार आहे. असं असताना अभिषेक शर्माचा फॉर्म चिंतेचा विषय ठरला आहे. साखळी फेरीतील तीन सामन्यात त्याला खातंही खोलता आलं नाही. त्यामुळे सुपर 8 फेरीत असंच सुरू राहिलं तर भारताची डोकेदुखी वाढेल. साखळी अमेरिका, पाकिस्तान आणि नेदरलँडविरुद्धच्या सामन्यात खातही खोलता आलं नाही. त्यामुळे त्याला प्लेइंग 11 मध्ये स्थान द्यायचं की नाही? असा प्रश्न उपस्थित होत आहे. भारताचा गोलंदाज प्रशिक्षक मोर्ने मोर्केलने याबाबत मोठी अपडेट दिली आहे.

काय म्हणाले मोर्ने मोर्केल?

दक्षिण अफ्रिकेविरुद्धच्या सुपर 8 फेरीपूर्वी मोर्ने मोर्केल पत्रकार परिषदेला सामोरं गेला. यावेळी त्याला अभिषेक शर्माच्या फ्लॉप शोबाबत प्रश्न विचारला गेला. तेव्हा मोर्केलने स्पष्ट सांगितलं की, संघ व्यवस्थापन अभिषेक शर्मासोबत आहे. अभिषेक शर्माच्या खराब फॉर्मबाबत कोणतीही चर्चा नाही. आम्हाला पूर्ण विश्वास आहे की तो चांगली कामगिरी करेल. मोर्केल म्हणाला की, ‘तीन शून्यांची चिंता करू नका. तो वर्ल्ड क्लास खेळाडू आहे. नेटमध्ये चेंडूंवर योग्य पद्धतीने प्रहार करत आहे.’ मोर्ने मोर्केलच्या या विधानातून एक गोष्ट स्पष्ट आहे की, अभिषेक शर्मा दक्षिण अफ्रिकेविरुद्धच्या सामन्यात प्लेइंग 11 भाग असेल.

अभिषेक शर्माची जागा घेण्यास संजू सॅमसनचा पर्याय आहे. पण त्याचीही बॅट हवी तशी चालत नाही. त्यात अभिषेक शर्मा असला तरी प्रतिस्पर्धी संघांना धडकी भरते. त्याने 41 टी20 आंतरराष्ट्रीय सामन्यात 1297 धावा केल्या आहेत. त्यात अभिषेक शर्मा आजारी असल्याने त्याला सहानुभूतीही आहे. रिकव्हर होण्यास वेळ लागू शकतो असं क्रीडाप्रेमींचं म्हणणं आहे. पण तीनवेळा शून्यावर बाद झाल्याने मानसिकतेवरही परिणाम होते. त्यामुळे त्याचा आक्रमक अंदाज दक्षिण अफ्रिकेविरुद्ध पाहायला मिळेल की सावध खेळी करेल हे सांगणं कठीण आहे.