IND vs NZ 3rd ODI: टीम इंडियाला नंबर-1 बनण्याची सूवर्णसंधी, आजच्या सामन्यात अशी असू शकते प्लेईंग-11

INDvsNZ 3rd ODI:  भारत आणि न्यूझीलंड यांच्यातील तिसरा एकदिवसीय सामना आज (24 जानेवारी) इंदूरच्या होळकर स्टेडियमवर खेळवला जाणार आहे. टीम इंडियाने पहिल्या सामन्यात न्यूझीलंडचा 12 धावांनी पराभव केला होता. तर दुसऱ्या सामन्यात आठ गडी राखून विजय मिळवला होता. भारतीय संघाने आजचा सामना जिंकल्यास मालिका 3-0 अशी खिशात घातली जाईल. तिसरी वनडे जिंकून भारताला नंबर-1 होण्याची संधीही आहे. भारतीय वेळेनुसार दुपारी 1.30 वाजता हा सामना खेळवला जाईल.

ओपनर शुभमन गिल उत्कृष्ट फॉर्ममध्ये आहे. गिलने पहिल्या सामन्यात द्विशतक तर दुसऱ्या सामन्यात नाबाद 40 धावांची खेळी केली. कर्णधार रोहित शर्मानेही दुसऱ्या सामन्यात अर्धशतक झळकावले होते.श्रीलंकेविरुद्ध दोन आणि बांगलादेशविरुद्ध एक शतक झळकावणारा विराट कोहली पहिल्या दोन सामन्यांमध्ये अपयशी ठरला होता, त्यामुळे त्याचे लक्ष्यही मोठा डाव खेळण्याचे असेल. 

टी-20 नंबर-1 फलंदाज सूर्यकुमार यादवकडून चांगल्या खेळीची अपेक्षा होती पण मालिकेतील पहिल्या सामन्यात चांगली कामगिरी करु शकला नाही. हार्दिक पांड्याही मधल्या फळीत पुरेसे योगदान दिलेले नाही. पदार्पणाच्या प्रतिक्षेत असलेला रजत पाटीदारही संघात आहे. अशा परिस्थितीत संघ व्यवस्थापन रजतला पदार्पणाची संधी देते की नाही हे पाहावे लागेल. पाटीदारने देशांतर्गत स्तरावर आपल्या कामगिरीने छाप पाडली आहे.