Icc T20i World Cup 2026 : शुक्रवारी ट्रिपल धमाका, झिंबाब्वे कांगारुंना पु्न्हा लोळवणार?

आयसीसी टी 20I वर्ल्ड कप 2026 स्पर्धेत गुरुवारी 12 फेब्रुवारीला श्रीलंकेने ओमानवर मात करत सलग दुसरा विजय मिळवला. इटलीने नेपाळवर 10 विकेट्सने मात करत दणदणीत विजय साकारला. तर दिवसातील तिसऱ्या आणि अंतिम सामन्यात टीम इंडियाने नामिबियावर 93 धावांनी मात केली. त्यानंतर आता शुक्रवारी 13 फेब्रुवारीला 3 सामन्यांचा थरार रंगणार आहे. शुक्रवारी ऑस्ट्रेलिया आपल्या मोहिमेतील दुसऱ्या सामन्यात झिंब्बावे विरुद्ध भिडणार आहे. कॅनडा विरुद्ध यूएई यांच्यात सामना होणार आहे. तर दिवसातील तिसऱ्या अंतिम सामन्यात यूएसएसमोर नेदरलँड्सचं आव्हान असणार आहे. या तिन्ही सामन्यांबाबत जाणून घेऊयात.

झिंबाब्वे पुन्हा ऑस्ट्रेलियाला धोबीपछाड देणार?

शुक्रवारी होणाऱ्या पहिल्या सामन्यात बी ग्रुपमधील 2 संघ आमनेसामने असणार आहेत. ऑस्ट्रेलिया विरुद्ध झिंबाब्वे यांच्यात हा सामना होणार आहे. ऑस्ट्रेलिया आणि झिंबाब्वे या दोघांचा हा या मोहिमेतील दुसरा सामना असणार आहे. दोन्ही संघांनी आपल्या मोहिमेची सुरुवात विजयाने केलीय. झिंबाब्वेने ओमानला पराभूत केलंय. तर ऑस्ट्रेलियाने 11 फेब्रुवारीला आयर्लंडवर मात केली. त्यामुळे आता ऑस्ट्रेलिया-झिंबाब्वे यांच्यात सलग दुसऱ्या विजयासाठी चुरस पाहायला मिळणार आहे. ऑस्ट्रेलिया विरुद्ध झिंबाब्वे सामन्याला सकाळी 11 वाजता सुरुवात होणार आहे. हा सामना कोलंबोतील आर प्रेमदासा स्टेडियममध्ये होणार आहे.

झिंबाब्वे पुन्हा जिंकणार?

झिंबाब्वेने ऑस्ट्रेलियाला 2007 साली झालेल्या पहिल्याच टी 20i वर्ल्ड कप स्पर्धेत ऑस्ट्रेलियाला पराभूत केलं होतं. आतापर्यंत उभयसंघात 3 टी 20i सामने खेळवण्यात आले आहेत. ऑस्ट्रेलियाने त्यापैकी 2 सामने जिंकले आहेत. मात्र ऑस्ट्रेलियाला टी 20i वर्ल्ड कप स्पर्धेत झिंबाब्वे विरुद्ध अद्याप जिंकता आलेलं नाही. त्यामुळे ऑस्ट्रेलिया शुक्रवारी झिंबाब्वेवर मात करत ही प्रतिक्षा संपवणार का? हे पाहणं महत्त्वाचं ठरणार आहे.

कॅनडा विरुद्ध यूएई

दिवसातील दुसऱ्या सामन्यात कॅनडा विरुद्ध यूएई आमनेसामने असणार आहेत. दोन्ही संघांचा हा या स्पर्धेतील दुसराच सामना असणार आहे. दोन्ही संघांनी आपला पहिला सामना गमावला आहे. त्यामुळे शुक्रवारी विजयाचं खातं कोण उघडणार? हे पाहणं महत्त्वाचं ठरणार आहे. या सामन्याला दुपारी 3 वाजता नवी दिल्लीतील अरुण जेटली स्टेडियममध्ये सुरुवात होणार आहे.

यूएसए विरुद्ध नेदरलँड्स

यूएसए विरुद्ध नेदरलँड्स हा शुक्रवारचा तिसरा आणि अंतिम क्रिकेट सामना असणार आहे. चेन्नईतील एमए चिंदबरम स्टेडियममध्ये या सामन्याला संध्याकाळी 7 वाजता सुरुवात होणार आहे. नेदरलँड्सने 2 पैकी 1 सामना जिंकलाय. तर 1 सामना गमावला. त्यामुळे नेदरलँड्सकडे हा सामना जिंकून सुपर 4 दावा मजबूत करण्याची संधी आहे. तर यूएसएला दोन्ही सामन्यात पराभूत व्हावं लागलंय. त्यामुळे यूएसए विजयाचं खातं उघडण्यात यशस्वी ठरणार का? या साठी निकालापर्यंत प्रतिक्षा करावी लागणार आहे.