BMC Election : ठाकरे बंधू विरुद्ध शिंदे अनेक राजकीय कारकिर्दींना फटका, शिवसेना कोणाची? ‘त्या’ ८७ जागांवरच होणार निर्णय

Mumbai : लोकसभा आणि विधानसभा निवडणुकीत उद्धव ठाकरे आणि एकनाथ शिंदे यांच्या पक्षांचा सामना झाला. आता महापालिका निवडणुकांमध्ये दोन्ही नेत्यांचे पक्ष आमनेसामने असतील. ही निवडणूक अनेकार्थांनी महत्त्वाची आहे. कारण उद्धव आणि राज ठाकरे एकत्र येऊन महायुतीला अंगावर घेत आहेत. दोघांची मुंबईतील ताकद पाहता यंदा अटीतटीची लढाई होऊ शकते. शिवसेना उबाठा-मनसे विरुद्ध शिंदेसेना असा थेट सामना मुंबईतील ८७ प्रभागांमध्ये होईल. त्यातून मुंबई कोणाची, या प्रश्नाचं उत्तर मिळेल.

लोकसभा निवडणुकीत उद्धव ठाकरे यांची शिवसेना वरचढ ठरली. मुंबईत ठाकरेंच्या पक्षानं ९ जागा जिंकल्या. तर शिंदेसेनेला केवळ १ जागा जिंकता आली नाही. ठाकरेंनी ४ जागा लढवत ३ जागांवर विजय साकारला. चौथी जागा केवळ ४८ मतांनी हातून गेली. तर शिंदेसेनेला ३ जागा जिंकून केवळ १ जागा जिंकता आली. विधानसभा निवडणुकीतही ठाकरेसेनेनं मुंबईत शिंदेसेनेला मागे टाकलं.

Larur : लातूर विद्यार्थिनी मृत्यू प्रकरण तापलं! नवोदयच्या अनुष्काचा मृत्यू की घातपात? गांधी चौकात महिलांचा संताप, साड्यांच्या दोरीने रस्ता रोखला

लोकसभा आणि विधानसभा निवडणुकीतील आकडेवारी पाहता मुंबईत ठाकरे यांचं वर्चस्व कायम असल्याचं निरीक्षण राजकीय जाणकार नोंदवतात. मुंबई महापालिकेच्या निवडणुका गेल्या २ निवडणुकांपेक्षा वेगळ्या असतील. खरी शिवसेना कोणाची, या प्रश्नाचं उत्तर या निवडणुकीच्या निकालातून मिळेल, असं राजकीय जाणकार सांगतात.

यंदा ठाकरे बंधू एकत्र लढत आहेत. त्यामुळे ठाकरे ब्रँड चर्चेत आहे. त्यांच्या 'मराठी माणूस' नरेटिव्हला कसा प्रतिसाद मिळतो, यावर निवडणुकीचा निकाल अवलंबून आहे. त्यामुळे ही अनेकार्थांनी दोन्ही शिवसेनेसाठी अखेरची लढाई आहे. यातून मुंबईचं राजकीय भविष्य आणि ठाकरेचं महत्त्व याचा फैसला होईल, असा राजकीय विश्लेषकांचा सूर आहे.

लोकसभा आणि विधानसभा निवडणुकांमध्ये ठाकरेंना सोडून गेलेल्या अनेक नेत्यांचा पराभव झाला. त्यात आमदार यामिनी जाधव, सदा सरवणकर, खासदार राहुल शेवाळे यांचा समावेश आहे. शिवसेना विरुद्ध शिवसेना संघर्षात हे नेते पराभूत झाले. गेल्या तीन ते साडे तीन वर्षांमध्ये ठाकरेंचे ४० हून अधिक माजी नगरसेवक शिंदेसेनेत गेले आहेत. ठाकरे बंधूंच्या युतीसमोर त्यांची कसोटी लागणार आहे.

मराठी माणूस कोणत्या विचारातून मदत करतो, याकडे सेना विरुद्ध सेना लढाईचा निकाल काय लागतो, ते ठरेल. यात शिंदेसेनेला फटका बसल्यास भाजपच्या महत्त्वाकांक्षी प्लानला धक्का बसू शकतो. कारण भाजपनं शिंदेसेनेसाठी ९० जागा सोडल्या आहेत. शिवडी, वरळी, दादर , माहीम, वडाळा, भांडूप, विक्रोळी, घाटकोपर (पश्चिम), मागाठाणे, दिंडोशी, दहिसर, वांद्रे (पूर्व) आणि कलिनात सेना विरुद्ध सेना लढत रंगेल.