Amit Shah : सहकाराच्या राजकारणात भाजप उतरणार ताकदीने; मास्टर प्लॅन अमित शहा बनवणार

महाराष्ट्रातील राजकारणावर पकड ठेवण्यासाठी सहकार हातात असणे आवश्‍यक आहे. आमदारकी, खासदारकी सहज मिळवता येते परंतु सहकाराच्या राजकारणात सहजासहजी एन्ट्री करता येत नाही. राज्यात काँग्रेस व राष्ट्रवादीला ज्या सहकाराने ताकद दिली तोच सहकार आज मोडकळीस आला आहे. राज्यातील गाव पातळीवरील सहकाराचे नवनिर्माण करण्यासोबतच नव्याने सहकारी संस्था स्थापन करण्याचा मास्टर प्लॅन केंद्रीय गृह व सहकारमंत्री अमित शहा यांनी हाती घेतला आहे.

प्रत्येक जिल्ह्यात नव्याने सहकारी संस्था स्थापन केल्या जाणार आहेत. त्यासाठी प्रत्येक जिल्ह्याला उद्दिष्ट दिले जाणार आहे. नव्याने स्थापन होणाऱ्या सहकारी संस्थांना आर्थिक पाठबळ देण्यासोबतच त्या त्या गावातील शासकीय जागाही देण्याची तयारी सहकार विभागाने केली आहे. जिल्हा पातळीवर सहकाराचे नवनिर्माण करण्यासाठी जिल्हाधिकाऱ्यांच्या अध्यक्षतेखाली समिती स्थापन करण्याच्या सूचना देण्यात आल्या आहेत. या समितीमध्ये जिल्हा परिषद, जिल्हा न्यायालय, जिल्हा बँक, जिल्हा दूध संघ यासह त्या त्या जिल्ह्यातील सहकाराशी निगडित असलेल्या अधिकारी व पदाधिकाऱ्यांचा समावेश या समितीत करण्यात आला आहे.