Accident News : मुंबई-गोवा महामार्गावर भारधाव गाडीने पत्रकाराला उडवलं, नातेवाईकांना घातपाताचा संशय

Accident News: मुंबई गोवा महामार्गावरील राजापूर कोदवली येथे पत्रकाराचा अपघाती मृत्यू झाला आहे. शशिकांत वारीसे असे या पत्रकाराचे नाव आहे. शशिकांत आपल्या दुचाकीत पंपातून पेट्रोल भरुन महामार्गावर येत असताना हा अपघात घडला. पंपावरून बाहेर पडताना त्यांनाभरधावर कारने उडवले.

मिळालेल्या माहितीनुसार महामार्गावर भरधाव थार गाडी आणि दुचाकी यांच्यात हा अपघात झाला. यात शशिकांत याला गंभीर दुखापत झाली होती. त्यानंतर त्याला उपचारासाठी कोल्हापूर येथील रुग्णालयात दाखल करण्यात आले होते. मात्र उपचारादरम्यान शशिकांत याचा मृत्यू झाला आहे.

या घटनेनंतर शशिकांत यांच्या नातेवाईकांनी पोलिसांत धाव घेऊन हा घातपात असल्याचा आरोप केला आहे. याप्रकरणी पंढरीनाथ आंबेरकर नावाच्या व्यक्तीला पोलिसांनी ताब्यात घेतले आहे. 

दरम्यान मुंबई मराठी पत्रकार संघाकडूनही ही हत्या असल्याचा आरोप करण्यात आला आहे. 'अन्यायाविरुद्ध धडाडणारी तोफ म्हणून ओळखले जाणारे पत्रकार शशिकात वारीशे यांची भ्याड हत्या करण्यात आली असून मुंबई मराठी पत्रकार संघ या हत्येचा तीव्र शब्दात निषेध करीत आहे', अशा शब्दात पत्रकार संघाने निषेध व्यक्त केला आहे.

तसेच संबंधित आरोपीला त्वरित अटक करून कठोरात कठोर शिक्षा व्हावी अशी मागणी पत्रकार संघाने केली आहे. या मागणीचे एक पत्र मुख्यमंत्री आणि उपमुख्यमंत्री यांना देखील पत्रकार संघाकडून पाठवण्यात आले आहे.