विश्वचषक नेमबाजी स्पर्धा : अंजुमला कांस्यपदक; पुरुषांच्या सांघिक गटात भारताला रौप्य

पीटीआय, चँगवॉन (कोरिया) : भारताच्या अंजुम मुदगिलने ‘आयएसएसएफ’ विश्वचषक नेमबाजी स्पर्धेत रविवारी महिलांच्या ५० मीटर रायफल थ्री पोझिशन्स प्रकारात कांस्यपदकाची कमाई केली. अंजुमने अंतिम फेरीत ४०२.९ गुणांसह तिसरे स्थान मिळवले. जर्मनीच्या अ‍ॅना जॅन्सेनने (४०७.७ गुण) सुवर्ण आणि इटलीच्या बार्बरा गॅमबारोने (४०३.४ गुण) रौप्यपदक आपल्या नावे केले. शनिवारी झालेल्या पात्रता फेरीत जागतिक अजिंक्यपद स्पर्धेतील रौप्यपदक विजेता अंजुमने सहाव्या स्थानी राहत अंतिम फेरी गाठली होती. अंजुमचे विश्वचषक स्पर्धेतील हे दुसरे पदक आहे. गेल्या महिन्यात बाकू येथे झालेल्या विश्वचषकात तिने याच प्रकारात रौप्यपदक जिंकले होते. 

दुसरीकडे, पुरुषांच्या ५० मीटर रायफल थ्री पोझिशन्स सांघिक गटात संजीव राजपूत, चैन सिंह आणि ऐश्वर्य प्रताप सिंह तोमर या भारतीय त्रिकुटाने रौप्यदपक जिंकले. भारताच्या त्रिकुटाने पात्रता फेरीत दुसरे स्थान मिळवत सुवर्णपदकाच्या लढतीसाठी पात्रता मिळवली. या लढतीत त्यांच्यासमोर चेक प्रजासत्ताकचे आव्हान होते. पीटर निमबुरस्की, फिलिप नेपेयचाल आणि जिरी प्रिव्रात्स्की यांचा समावेश असलेल्या चेक प्रजासत्ताकच्या संघाने चुरशीच्या लढतीत १६-१२ अशी सरशी साधत सुवर्णपदक कमावले.

भारतीय नेमबाजांनी या विश्वचषकात आतापर्यंत चमकदार कामगिरी केली आहे. रविवारी एक कांस्य आणि एक रौप्यपदक मिळवत भारताने एकूण ११ पदकांसह आपले अग्रस्थान कायम राखले आहे. भारताच्या खात्यावर चार सुवर्ण, पाच रौप्य आणि दोन कांस्यपदके आहेत.