पिंपरी चिंचवडात माेठा पाेलिस बंदाेबस्त तैनात; संभाजीराजे छत्रपती देणार भेट

पिंपरी चिंचवड : महाराष्ट्राचे आराध्य दैवत छत्रपती शिवाजी महाराज यांच्या बद्दल वारंवार केले जाणारे आक्षेपार्ह विधान थांबविण्यासाठी भाजप सोडून इतर सर्व संघटनांनी आज (गुरुवार) पिंपरी चिंचवड बंदची हाक दिली आहे. त्यामुळे आज सकाळपासून पिंपरी चिंचवड शहरातील मुख्य बाजारपेठ बंद ठेवण्यात आली आहे.

राज्यपाल भगत सिंह कोश्यारी तसेच भारतीय जनता पक्षाच्या काही नेते मंडळीकडून छत्रपती शिवाजी महाराजांबद्दल वारंवार बेताल वक्तव्य करण्यात येत आहे. याचाच निषेध करण्यासाठी आज सर्व पक्ष आणि संघटनांनी पिंपरी चिंचवड शहर बंद पुकारला आहे.

भाजप सोडून इतर सर्व पक्ष व संघटनांनी पुकारलेल्या बंद मध्ये आज छत्रपती संभाजीराजे भोसले हे देखील सहभागी होणार आहेत. आजच्या पिंपरी चिंचवड शहर बंद मध्ये जीवनावश्यक वस्तू सोडून इतर सर्व सेवा व दुकान बंद ठेवण्याचा आवाहन सर्वपक्षीय संघटनांनी केला आहे. बंदच्या पार्श्वभूमीवर पिंपरी चिंचवड शहरातील मुख्य बाजारपेठेत कडेकोट पोलीस बंदोबस्त लावण्यात आला आहे.