‘तुमच्या सरकारमध्ये याकुब मेमनच्या कबरीचं सुशोभीकरण’ झाल्याचं विचारताच अजित पवार संतापले; म्हणाले “उद्या तू मुख्यमंत्री असता तर तुझ्या काळातही व्हायला नको होतं ”

भाजपा नेत्यांकडून होणाऱ्या टीकेबद्दल विचारण्यात आलं असता ते म्हणाले “‘लक्ष्य करण्याशिवाय यांच्याकडे दुसरे मुद्दे नाहीत. यांना महागाई, बेरोजगारीसंबंधी बोलता येत नाही. शेतकरी हवालदिल झाला असून रोज आत्महत्या करत आहे. त्याला ताठमानेने उभं करण्यासाठी मदत करत नाही. आणि लोकांचं लक्ष दुसरीकडे वळवण्यासाठी ही निती आहे. या गोष्टीला महत्त्व देण्याचं कारण नाही”.

तुमच्या सरकारमध्ये सुशोभीकरण झाल्याचं विचारण्यात आलं असता अजित पवारांनी, “कोणाचंही सरकार असू द्या ना, तू मुख्यमंत्री असता तर तुझ्या काळातही व्हायला नको होतं,” असं उत्तर दिलं.

१९९३ साली मुंबईत झालेल्या बॉम्बस्फोट प्रकरणात आर्थिक सहभाग आढळल्यानंतर याकुब मेमनला न्यायालयाने दोषी ठरवले होते. क्षमायाचनेच्या याचिका फेटाळल्यानंतर याकुबला नागपूरच्या मध्यवर्ती कारागृहात ३० जुलै २०१५ रोजी फाशीची शिक्षा देण्यात आली होती. या बॉम्बस्फोट प्रकरणात याकुबचा भाऊ टायगर मुख्य संशयित आरोपी आहे. मुंबई बॉम्बस्फोटात २५७ जणांनी आपला जीव गमावला होता. जवळपास १४०० हून अधिक नागरिक या स्फोटात जखमी झाले होते.