आम्हीच निष्ठावंत शिवसैनिक, पिंपरी-चिंचवड आणि देहूरोड इथल्या शिवसैनिकांनी शंभर रुपयांच्या स्टॅम्प पेपरवर दिले प्रतिज्ञापत्र

शिवसेना पक्षप्रमुख उद्धव ठाकरे यांना शिवसैनिकांनी शंभर रुपयांच्या स्टॅम्प पेपरवर लिहिलेले प्रतिज्ञापत्र सादर केले आहे. यामध्ये आम्हीच खरे शिवसैनिक असल्याचा विश्वास त्यांनी उद्धव ठाकरे यांना दिला आहे. २७ जुलै रोजी शिवसेना पक्षप्रमुख उद्धव ठाकरे यांचा वाढदिवस होता. त्या निमित्ताने पिंपरी -चिंचवड, देहूरोड येथून आलेल्या शिवसैनिकांनी शिवसैनिकांनी उद्धव ठाकरे तुम आगे बढो हम तुम्हारे साथ है अशा घोषणा देत परिसर दणाणून सोडला.

महाराष्ट्रात गेल्या काही दिवसांत शिवसेनेत अनेकानी शिंदे गटाला साथ दिल्याचं जाहीर केलं आहे. यामुळे अनेक ठिकाणी शिवसेना कमकुवत झाल्याचं चित्र दिसत आहे. मात्र काहीही झाले तरी आम्ही उद्धव ठाकरे यांच्या सोबत आहोत आणि आमची शिवसेनेवर निष्ठा आहे, असे प्रतिज्ञापत्र आत्तापर्यंत हजारो कार्यकर्त्यांनी सादर केलं आहे. असे प्रतिज्ञा पत्र घेण्याची मोहीमच शिवसेनेने हाती घेतली आहे. देहूरोड येथील शिवसैनिकांनीसुद्धा हे प्रतिज्ञापत्र सादर केले आहे. आमच्या मनात शिवसनेबद्दल निष्ठा आणि श्रद्धा असल्याचे म्हटले यात आहे. शिवसेना पक्षप्रमुख उद्धव ठाकरे यांना बिनशर्त पाठिंबा असेल असे देखील म्हटले आहे. एकीकडे मावळ लोकसभेचे बंडखोर खासदार श्रीरंग बारणे हे शिंदे गटात गेल्याने शिवसेनेचे कार्यकर्ते त्यांच्यासोबत जातील अशी अपेक्षा व्यक्त केली जात होती. शिवसैनिकांनी मात्र आम्ही शिवसेनेसोबत असल्याचे दाखवून दिले आहे.

शिवसैनिकांनी सादर केलेल्या प्रतिज्ञापत्रात नेमके काय लिहिले आहे?

माझी शिवसेना पक्षाच्या घटनेवर पूर्ण निष्ठा आणि श्रद्धा आहे. तसेच हिंदुहृदयसम्राट वंदनीय शिवसेना प्रमुख बाळासाहेब ठाकरे यांनी घालून दिलेले आदर्श आणि तत्वांवर अढळ निष्ठा आहे. मी असेही प्रतिज्ञापूर्वक सांगतो की आदरणीय शिवसेना पक्ष प्रमुख उद्धव ठाकरे यांच्या नेतृत्वावर अढळ विश्वास असून त्यांना माझा बिनशर्त पाठिंबा आहे. आदरणीय शिवसेना पक्ष प्रमुख उद्धव ठाकरे यांच्या प्रति मी पूर्ण निष्ठा व्यक्त करीत आहे आणि या निष्ठेची पुनश्च: पुष्टी करीत आहे. यांच्या नेतृत्वाखाली शिवसेनेच्या घटनेत नमूद केलेली उद्दिष्ट्ये पूर्ण करण्यासाठी मी सदैव कार्यरत राहीन याची या प्रतिज्ञा पत्राद्वारे ग्वाही देत आहे.