मराठी भाषा गौरव दिन विशेष:अंबानींची ही सूनबाई, मेथीची भाजी चवीनं खाई

मराठी भाषेला अनेक दिग्गज मराठी लेखकांनी वैभव प्राप्त करून दिले. त्यांनी लेखणीतून निर्माण केलेल्या काही विलक्षण व्यक्तिरेखांचे गारूड आजही मराठी मनावर आहे. या व्यक्तिरेखांनी आजच्या ताज्या बातम्यांचे रिपोर्टिंग कसे केले असते, अशी मांडणी मराठी भाषा गौरव दिनानिमित्त दिव्य मराठीच्या या प्रयोगात केली आहे. मिश्किल विनोदाने गुदगुल्या करणारे चिं.वि. जोशी यांची चिमणराव ही व्यक्तिरेखा म्हणजे आदर्श कुटुंबप्रमुख. ते सांगतायत अंबानींच्या सूनबाई राधिकांच्या मेथीभाजी प्रेमाविषयी. काऊ, बघ तू मला नेहमी विचारत असतेस ना की, मोठ्या माणसाची लक्षणं काय असतात. तर तुला म्हणून सांगतो बरे. अगं, त्या मुकेश अंबानींची सूनबाई राधिका गुरुवारी छत्रपती संभाजीनगरातील पैठण एमआयडीसीतील आपल्या एन्कोर हेल्थकेअर या औषधनिर्मिती कंपनीला भेट देण्यासाठी वडील वीरेन मर्चंट यांच्यासोबत आली होती. गेल्या तीन महिन्यांत त्या दुसऱ्यांदा पैठणला आल्या होत्या. या भेटीत राधिका यांनी कंपनीतील महिला कर्मचाऱ्यांसोबत मराठीत संवाद साधला. ‘आपलीच कंपनी समजून सर्वांनी काम करा’असा आपुलकीचा सल्ला त्यांनी दिला. तसेच कर्मचाऱ्याच्या घरून आलेल्या डब्यातील मेथीची भाजी आणि चपातीचे जेवण केले. पैठण एमआयडीसीत रोजगार वाढला पाहिजे यासाठी भविष्यात प्रयत्नशील राहू, असे त्यांनी अमेरिकन शिष्टमंडळाशी बोलताना सांगितले. म्हणजे यातून काऊ तुला हे शिकायचंय की, मोठी माणसं नेहमी जमिनीवर असतात. सामान्य माणसांशी आपुलकीनं वागतात. राधिका लवकरच आपल्या एन्कोर हेल्थकेअर या कंपनीच्या विस्ताराची योजना राबवणार असल्याची माहिती सूत्रांनी दिली. त्यामुळे पैठण एमआयडीसीतील उद्योगांना चालना मिळणार आहे, असं म्हटलं जातंय बरं.