मराठी भाषा गौरव दिन विशेष:फी न दिल्याने शाळेतून काढणे अयोग्य- न्यायालय, व्यवस्थेवर उपरोधिक टीका करणारा तरुण

मराठी भाषेला अनेक दिग्गज मराठी लेखकांनी वैभव प्राप्त करून दिले. त्यांनी लेखणीतून निर्माण केलेल्या काही विलक्षण व्यक्तिरेखांचे गारूड आजही मराठी मनावर आहे. या व्यक्तिरेखांनी आजच्या ताज्या बातम्यांचे रिपोर्टिंग कसे केले असते, अशी मांडणी मराठी भाषा गौरव दिनानिमित्त दिव्य मराठीच्या या प्रयोगात केली आहे. कोसलाकार भालचंद्र नेमाडेंनी मराठी साहित्यातील कादंबरीचा पोत बदलला. त्यांच्या ‘कोसला’ या कादंबरीचा तरुण नायक पांडुरंग सांगवीकर सांगतोय शिक्षण विषयाची बातमी. फी न दिल्याने शाळेतून काढणे अयोग्य- न्यायालय, व्यवस्थेवर उपरोधिक टीका करणारा तरुण पांडुरंग सांगवीकर | नागपूर हॅ:! काय हे भयंकर चाललंय सगळं. भंडाऱ्याच्या एका शाळेने त्या सातवीतल्या पोरीला म्हणे 23,900 रुपये फी भरली नाही तर घरी पाठवले. उदाहरणार्थ, पैसे टाका आणि ‘शहाणपण’ विकत घ्या.पण नागपूरच्या खंडपीठाचे न्यायमूर्ती किलोर आणि न्यायमूर्ती वाकोडे 6 ते 14 वयोगटातल्या पोरांना शिकवणं हा त्यांचा ‘फंडामेंटल राइट’ आहे. अनुच्छेद 21-अ वगैरे काहीतरी कायदे म्हणजे उदाहरणार्थ सांगायचं तर, ‘बालकांना मोफत व सक्तीचे शिक्षण हक्क अधिनियम, 2009’ अंतर्गत संरक्षित असल्याचे त्यांनी सुनावले. हँ.. शाळा म्हणते, सीबीएसईला आरटीई लागू नाही.” हे काय इन्स्टिट्यूशनल लॉजिक! यासंदर्भात महाराष्ट्र शैक्षणिक संस्था अधिनियम, 2011 मधील कलम 3 (अ) चा उल्लेख करत फी न भरल्यास निष्कासनाची तरतूद नसल्याचे स्पष्ट करण्यात आले. तसेच, सर्वोच्च न्यायालयाच्या ‘सुखदेब साहा विरुद्ध आंध्र प्रदेश राज्य’ या निर्णयाचा दाखला देत शैक्षणिक संस्थांची जबाबदारी विद्यार्थ्यांचा विकास आणि सुरक्षितेची असल्याचे सुनावले.