पैसा घे, पण तुझा पती मला दे, विवाहित प्रियकराला मिळवण्यासाठी गर्लफ्रेंडने जे केलं त्याने सगळेच थक्क, वेडं प्रेम

सध्याच्या जमान्यात प्रेम मोठं की पैसा? तर अनेक जण पैसा म्हणतील. पण आजही असे प्रेम करणारे आहेत, ज्यांच्यासाठी पैशापेक्षा प्रेम जास्त महत्वाचं आहे. प्रेमासाठी ते काहीही करायला तयार असतात. पैसा सुद्धा त्यांच्यासमोर कवडीमोल असतो. अशीच एक घटना समोर आली आहे. जिथे प्रेयसीने विवाहित प्रियकराचं प्रेम मिळवण्यासाठी आपली सर्व संपत्ती दान करण्याचा निर्णय घेतला. हा सर्व घटनाक्रम 90 च्या दशकातील ‘जुदाई’ चित्रपटाची आठवण करुन देतो. फरक इतकाच आहे की, ही स्टोरी पडद्यावरची नसून खऱ्या आयुष्यातली आहे. मध्य प्रदेशच्या भोपाळ फॅमिली कोर्टातील हे प्रकरण आहे.

भोपाळमध्ये एक 42 वर्षीय सरकारी कर्मचारी त्याच्याच विभागात काम करणाऱ्या महिला अधिकाऱ्याच्या प्रेमात पडला. ती वयाने 10 वर्षाने मोठी आहे. वेळेबरोबर दोघांमध्ये जवळीक वाढली आणि प्रियकराच्या घरात तणाव वाढू लागला. पती-पत्नीमध्ये विवाहबाह्य संबंधांवरुन भांडणं वाढू लागली. याचा परिणाम त्यांच्या 16 आणि 12 वर्षाच्या मुलीच्या मनावर होऊ लागला. घरातलं वातावरण इतकं बिघडलं की, मोठ्या मुलीने फॅमिली कोर्टाचे दरवाजे ठोठावले.

घटस्फोटासाठी तो तयार झाला

न्यायालयात काउंसलिंगची सत्र सुरु झाली. अनेक बैठकांनंतर पतीने स्पष्ट केलं की, त्याला त्याची ऑफिसमधील सहकारी आणि प्रेयसी सोबत रहायचं आहे. घटस्फोटासाठी तो तयार झाला. घरातला तणाव आता असहनीय झालाय हे सुद्धा त्याने मान्य केलं. त्याचं मुलींवर भरपूर प्रेम आहे. जवळपास पाच वर्ष चाललेल्या या वादात अखेर तडजोडीचा मार्ग निघाला.

पतीच्या प्रेयसीने लगेच हा प्रस्ताव स्वीकारला

पत्नीने तिच्या आणि मुलींच्या आर्थिक सुरक्षिततेला प्राधान्य दिलं. तिने पतीकडे डुप्लेक्स घर आणि 27 लाख रुपये रोख रक्कमेची मागणी केली. आश्चर्याची बाब म्हणजे पतीच्या प्रेयसीने लगेच हा प्रस्ताव स्वीकारला. घर आणि रोख रक्कम मिळून दीड कोटी रुपये द्यायला ती तयार झाली. प्रियकराच्या कुटुंबावर कुठलही संकट येऊ नये अशी तिची इच्छा होती. आता दोन्ही पक्ष परस्पर सहमतीने वेगळे झालेत.

हे असं पहिलं प्रकरण असावं

1997 साली आलेला जुदाई चित्रपट सुद्धा असाच होता. पती, पत्नी आणि वो मध्ये पैशाच्या बदल्यात नात्याचा सौदा झाला होता. स्वार्थ हे त्यात मुख्य कारण होतं. भोपाळच्या या प्रकरणात परस्पर सहमती आणि मुलांच्या सुरक्षित भविष्याला आधार बनवण्यात आलं आहे. भोपाळमधील हे असं पहिलं प्रकरण असावं, जिथे प्रेयसीने प्रियकराला मिळवण्यासाठी इतकी मोठी रक्कम चुकवली असेल.