पुणे : सर्व पोलिस ठाण्यात बालस्नेही आणि महिला कक्षाची लवकरच स्थापना - चंद्रकांत पाटील

पुणे - पुण्यातील १८ पोलिस ठाण्यात बालस्नेही कक्ष आणि महिला व बाल पथक कक्ष स्थापन करण्यात आली आहेत. उर्वरित पोलिस ठाण्यात लवकरच अशा प्रकारच्या कक्षाची स्थापना करण्यात येईल; त्यासाठी जिल्हा नियोजन समितीतून निधी देण्यात येईल, असे प्रतिपादन उच्च व तंत्रशिक्षण मंत्री तथा पालकमंत्री चंद्रकांत पाटील यांनी केले.

पालकमंत्री पाटील यांच्या हस्ते स्वारगेट पोलिस ठाण्यातील बालस्नेही कक्ष व महिला व बाल पथक कक्षाच्या उद्घाटनप्रसंगी ते बोलत होते. या वेळी पोलिस आयुक्त रितेश कुमार, पोलिस सह आयुक्त संदीप कर्णिक, अतिरिक्त पोलिस आयुक्त राजेंद्र डहाळे, पोलिस उपायुक्त स्मार्तना पाटील, सहायक पोलिस आयुक्त सुषमा चव्हाण, वरिष्ठ पोलिस निरीक्षक अशोक इंदलकर, पोलिस निरीक्षक सोमनाथ जाधव आदी उपस्थित होते.

पाटील म्हणाले, कायद्यानुसार सर्वच पोलिस ठाण्यांमध्ये बालस्नेही कक्ष व महिला व बाल पथक कक्षाची सुरुवात होणार आहे. लहान बालके व महिलांवर अन्याय व अत्याचार झाल्यास ते पोलिस ठाण्यात आल्यानंतर त्यांना पोलिसांची भीती वाटू नये, त्या ठिकाणी विश्वास वाटावा, यासाठी या कक्षाची स्थापना करण्यात आली आहे.

ते म्हणाले, बालस्नेही कक्षात येणारे अत्याचारित बालक, विधीसंघर्षग्रस्त बालक बोलके व्हावे, गुन्ह्याची नोंद होईपर्यंत त्यांच्या बसण्याची, रमण्याची, खेळण्याची व्यवस्था करण्यासाठी या कक्षाची स्थापना करण्यात आली आहे. कक्ष उभारण्यासाठी सामाजिक उत्तरदायित्व निधीसोबतच जिल्हा नियोजन समितीतून निधी देण्यात येईल.

आरोपींनी गुन्हा केल्यानंतर त्याला लवकर जामीन मिळाला नाही, न्यायालयात गतीने खटले दाखल करुन चालवले आणि गुन्हे सिद्धतचे प्रमाण वाढून शिक्षा झाल्यास आरोपींच्या मनात कायद्याचा धाक निर्माण होईल. त्यादृष्टीने सरकारचे प्रयत्न सुरू आहेत.

या वेळी त्यांनी मुलांना खेळणी व खाऊचे वाटप केले. तसेच, गुलटेकडी येथील सेठ दगडूराम विद्यालयातील विद्यार्थ्यांना चॉकलेटचे वाटप केले. यावेळी ‘होप फॉर दि चिल्ड्रेन फॉऊडेशन’चे व्यवस्थापक शकील शेख यांचा कक्ष उभारणीमध्ये केलेल्या योगदानाबद्दल सत्कार करण्यात आला.

आमदार माधुरी मिसाळ यांच्या आमदार निधीतून स्वारगेट पोलिस ठाणे अंतर्गत बालस्नेही कक्षाची उभारणी करण्यात आली आहे. पोलिस ठाणे परिसरातील रंगरंगोटी व स्वच्छता तसेच नूतनीकरण पुणे पोलिस मास निधीतून करण्यात आले आहे.

कायद्यानुसार प्रत्येक पोलिस ठाण्यात बाल कल्याण पोलिस अधिकारी नेमणे आवश्यक आहे. बालकांचे जबाब नोंदवितांना त्यांच्यावर दडपण येऊ नये, यासाठी हे बालकल्याण पोलिस अधिकारी पीडित बालक, विधीसंघर्षग्रस्त बालकांसोबत संवाद साधतील. तसेच. त्यांचे समुपदेशन करण्यात येईल. अत्याचारग्रस्त बालक त्यांच्यावर घडलेल्या अत्याचाराची माहिती विश्वासाने व मनमोकळेपणाने देण्यासाठी कक्षात खेळीमेळीचे वातावरण निर्माण करण्यासाठी येथे प्रयत्न केला जाणार आहे.

बालकांच्या जीवनात सकारात्मक बदल करण्यासाठी त्यास प्रोत्साहित करणे, बालक गैरवर्तन करु नये यासाठी त्यांच्या मनात सकारात्मक विचार निर्माण करण्यात येणार आहेत. बालकाला घडलेल्या घटनेची माहिती देण्यासोबत त्यास समुपदेशन व मानसशास्त्रीय आधार किंवा वैद्यकीय उपचार देण्याचे काम या ठिकाणी होणार आहे. स्वारगेट पोलिस ठाणे व होप फॉर दि चिल्ड्रेन फौंडेशन यांच्या समन्वयाने बालस्नेही कक्षाचे कामकाज करण्यात येणार आहे.

शहरात कोयते हातात घेऊन दहशत माजविणाऱ्या गुंडांच्या विरोधात कठोर कारवाई करुन त्यांच्यावर जरब बसवा, असे आदेश पालकमंत्री चंद्रकांत पाटील यांनी दिले. स्वारगेट पोलिस ठाण्याच्या आवारात सुरू करण्यात आलेल्या बालस्नेही कक्षाचे उद्घाटन पालकमंत्री चंद्रकांत पाटील यांच्या हस्ते झाले. या वेळी ते पत्रकारांशी बोलत होते. पुणे शहराची लोकसंख्या वाढत चालली आहे. नोकरी, रोजगाराच्या शोधात शहरात येणाऱ्या नागरिकांची माहिती पोलिसांकडे नाही. शहरात गुन्हेगारी घटना वाढत आहेत. गुन्हेगारांना जरब बसविण्यासाठी पोलिसांनी प्रयत्न करावेत. गुन्हेगारांना कठोर शिक्षा झाल्यास त्यांच्यावर जरब बसेल.