अहमदनगर : राज ठाकरेंच्या ताफ्यातील गाड्यांचा घोडेगावजवळ अपघात

अहमदनगर : राज ठाकरेंच्या ताफ्यातील गाड्यांचा अपघात झाल्याची घटना घडली आहे. अहमदनगरच्या पुढे घोडेगाव जवळ हा अपघात झाला असल्याची माहिती मिळत आहे. या अपघातात दिग्दर्शक केदार शिंदे आणि अभिनेता अंकुश चौधरी यांच्या गाड्याचे नुकसान झाल्याची माहिती मिळाली आहे.

सदर अपघात अहमदनगर जिल्ह्यातील घोडेगावजवळ झाला असून या अपघातातील जखमींची माहिती अद्याप मिळालेली नाही. या अपघातात ताफ्यातील तीन गाड्या एकमेकांना मागून धडकल्या असून त्यामध्ये मराठी चित्रपटसृष्टीतील दिग्दर्शक केदार शिंदे आणि कलाकार अंकुश चौधरी यांच्या गाड्याचं नुकसान झालं आहे.

राज ठाकरे यांची उद्या औरंगाबाद येथे जाहीर सभा होणार आहे. त्यानिमित्ताने राज ठाकरे यांचा ताफा पुण्यातून औरंगाबादकडे रवाना झाला होता. आज सकाळी १०० पुरोहितांच्या हाताने पूजापाठ करुन त्यांचा ताफा वढू येथील छत्रपती संभाजी महाराजांच्या समाधीचं दर्शन घेण्यासाठी थांबला होता. त्यानंतर पुढच्या मार्गावर रवाना झाल्यावर अहमदनगर जिल्ह्यातील घोडेगाव येथे पुणे औरंगाबाद रस्त्यावर हा अपघात घडला आहे.

दरम्यान राज ठाकरे यांनी भोंग्याच्या प्रश्नावर केलेल्या वक्तव्यावरून महाराष्ट्रभर वाद पेटला आहे. राज ठाकरे हे १ मे ला औरंगाबाद आणि ५ मे ला अयोध्या येथे सभा घेणार असल्याचं जाहीर केलं होतं. त्यानंतर त्यांच्या औरंगाबाद येथील सभेसाठी पोलिसांकडून परवानगी देण्यात आली नव्हती पण दोन दिवसांपूर्वी काही अटी घालून त्यांच्या सभेला परवानगी देण्यात आली आहे. उद्याच्या सभेनंतर ते अयोध्येला रवाना होणार आहेत.