अवघडचं आहे राव… ‘प्लास्टिकमध्ये गुंडाळून जेवण’ खाण्याचा नवा ट्रेंड; सोशल मीडियावर तुफान चर्चा

सोशल मीडियावर दररोज नवनवीन ट्रेंड्स समोर येत असतात. सध्या चीनच्या तरुणांमध्ये एकाच ट्रेंड्ची जोरदार चर्चा सुरू आहे. काहीजण प्लास्टिकने गुंडाळलेले अन्न खात असल्याचे व्हिडिओ शेअर करत आहेत, ज्यामुळे आरोग्याबाबत चिंता व्यक्त केली जात आहे. टिकटॉक, डोयिन आणि इतर प्लॅटफॉर्मवर हे व्हिडिओ वेगाने व्हायरल होत असून या प्रकारावर जोरदार चर्चा सुरू आहे. तज्ज्ञांच्या मते, अशा प्रकारचे प्रयोग आरोग्यासाठी धोकादायक ठरू शकतात, त्यामुळे सावधगिरी बाळगणे आवश्यक आहे.

काय आहे प्लास्टिक ईटिंग ट्रेंड?

सध्या सोशल मीडियावर “प्लास्टिक ईटिंग” नावाचा एक वेगळाच ट्रेंड चर्चेत आला आहे. या प्रकारात काही जण आपल्या तोंडावर प्लास्टिक रॅप लावून त्याच्या आत अन्न ठेवतात, ते चावतात आणि नंतर थुंकून टाकतात. काही समर्थकांचा दावा आहे की यामुळे कॅलरी न घेता पोट भरल्यासारखे वाटते आणि भूक कमी लागते.

मात्र तज्ज्ञांच्या मते हा प्रकार पूर्णपणे चुकीचा आणि आरोग्यासाठी धोकादायक आहे. प्लास्टिकमधील रसायनांचा शरीरावर विपरीत परिणाम होऊ शकतो. शिवाय, अन्नाशी असा प्रयोग केल्याने गुदमरल्याचा किंवा संसर्गाचा धोका देखील संभवतो. त्यामुळे अशा व्हायरल ट्रेंडपासून दूर राहण्याचा सल्ला दिला जात आहे.

शरीरावर कशा प्रकारे परिणाम होतो?

विचित्र ट्रेंडचा शरीरावर गंभीर परिणाम होऊ शकतो, असे तज्ज्ञांचे मत आहे. काही संशोधनांनुसार मायक्रोप्लास्टिकचे अतिसूक्ष्म कण शरीरात गेले तर पचनसंस्थेला त्रास होऊ शकतो. त्यामुळे पोटदुखी, गॅस, मळमळ यांसारख्या समस्या निर्माण होण्याची शक्यता असते.

इतकेच नव्हे तर प्लास्टिकचे सूक्ष्म कण श्वासावाटे शरीरात प्रवेश करू शकतात, ज्यामुळे खोकला किंवा श्वसनास अडथळा निर्माण होऊ शकतो. प्लास्टिकमध्ये आढळणारे BPA सारखे रसायन शरीरातील हार्मोन्सच्या संतुलनावर परिणाम करू शकते. दीर्घकाळ असा संपर्क राहिल्यास यकृत आणि फुफ्फुसांवरही विपरीत परिणाम होण्याची भीती व्यक्त केली जात आहे.

मानसिक आरोग्यावरही ट्रेंडचा परिणाम

या ट्रेंडचा परिणाम फक्त शारीरिकच नाही, तर मानसिक आरोग्यावरही होऊ शकतो, असा इशारा तज्ज्ञांनी दिला आहे. खाण्याबाबत भीती किंवा अपराधीपणाची भावना निर्माण झाल्यास अन्नाशी नकारात्मक नातं तयार होऊ शकतं. कॅलरीच्या भीतीमुळे वारंवार अन्न चावून थुंकण्याची सवय लागल्यास ते पुढे जाऊन ‘इटिंग डिसऑर्डर’चे रूप घेऊ शकते.

या ट्रेंडमुळे वजन कमी होतं का ?

वजन कमी करण्यासाठी हा उपाय प्रभावी ठरतो का, याबाबतही स्पष्ट नकार दिला जातो. अशा पद्धतीमुळे शरीराची भूक नियंत्रणात राहत नाही; उलट नंतर जास्त खाण्याची शक्यता वाढते. त्यामुळे दीर्घकाळात याचा फायदा होण्याऐवजी नुकसानच अधिक होऊ शकते.

सोशल मीडियावर ट्रेंडवर टीका

सोशल मीडियात अनेकांनी या ट्रेंडवर टीका केली आहे. काही तरुणांनी अशा धोकादायक प्रयोगांपासून दूर राहावे, असा सल्ला दिला आहे. योग्य आहार, नियमित व्यायाम आणि तज्ज्ञांचा सल्ला हेच वजन नियंत्रणाचे सुरक्षित आणि प्रभावी मार्ग असल्याचेही अनेकांनी नमूद केले आहे.