मुंबई : परिचारिकांचा संप सुरूच ; वैद्यकीय शिक्षणमंत्र्यांशी सकारात्मक चर्चा; मात्र लेखी आश्वासनांवर ठाम

मुंबई : मागील चार दिवसांपासून सुरू असलेला राज्यातील सरकारी रुग्णालयांतील परिचारिकांचा संप मंगळवारी मागे घेतला जाण्याची शक्यता होती. वैद्यकीय शिक्षण मंत्री अमित देशमुख आणि परिचारिकांचे शिष्टमंडळ यांच्यात सकारात्मक चर्चा झाल्याने रात्रीपर्यंत संप मागे घेतला जाईल, अशी अपेक्षा होती. मात्र मागण्यांबाबत लेखी आश्वासन तसेच बैठकीचे इतिवृत्त मिळाल्याशिवाय संप मागे न घेण्याची भूमिका परिचारिका संघटनांनी घेतली. परंतु रात्री उशिरापर्यंत लेखी आश्वासन न मिळाल्याने संप सुरू ठेवण्याचा निर्णय परिचारिका संघटनांनी घेतला. त्यामुळे बुधवारीही संप सुरूच राहणार आहे. 

परिचारिकांची विनंती आधारित बदली करण्यासह पदभरती, पदोन्नती इत्यादी बऱ्याच काळापासून प्रलंबित मागण्यांसाठी राज्यभरातील सरकारी रुग्णालयांतील परिचारिकांनी २८ मेपासून बेमुदत संप पुकारला. राज्यभरातील हजारो परिचारिका बेमुदत संपावर गेल्याने मुंबईतील जे जे रुग्णालय, जी टी रुग्णालय आणि सेंट जॉर्ज रुग्णालयासह राज्यातील सरकारी रुग्णालयांतील रुग्णसेवेवर परिणाम झाला आहे. अनेक शस्त्रक्रिया रद्द करण्यात आल्या आहेत.

 सरकारने मंगळवारी अखेर या आंदोलनाची दखल घेतली. दुपारी मंत्रालयात अमित देशमुख आणि संघटनांमध्ये बैठक पार पडली. या बैठकीत सर्व मागण्यांवर चर्चा झाली आणि या मागण्या मान्य करण्याचे आश्वासन यावेळी देशमुख यांनी दिले. मात्र त्याचवेळी या मागण्या पूर्ण करण्यासाठी किमान एक महिना लागेल, असेही स्पष्ट केले. एकूणच चर्चा सकारात्मक झाल्याने रात्रीपर्यंत संप मागे घेतला जाईल असे वाटत होते. परंतु बैठकीचे इतिवृत्त हाती न मिळाल्याने संप सुरूच राहणार असल्याची माहिती महाराष्ट्र राज्य परिचारिका संघटनेच्या अध्यक्षा डॉ मनीषा शिंदे यांनी दिली. बैठकीचे इतिवृत्त मिळाल्यानंतर सहकाऱ्यांशी चर्चा करून संपाबाबत निर्णय घेऊ असेही त्यांनी सांगितले.