ओतूर: भरधाव पिकअपचा कहर: कल्याण–अहिल्यानगर महामार्गावर ५० फूट फरफटून युवकाचा दुर्दैवी अंत!

ओतूर: भरधाव पिकअपचा कहर; महामार्गावर ५० फूट फरफटून युवक ठारकल्याण–अहिल्यानगर महामार्गावरील करंजाळे गावाजवळ रविवारी (दि. ७ जून २०२६) सकाळी एक भीषण अपघात घडला. एका भरधाव पिकअप वाहनाने दुचाकीला जोरदार धडक दिल्याने खानगाव येथील एका युवकाचा जागीच मृत्यू झाला.

नेमकी घटना काय? मिळालेल्या माहितीनुसार, एमएच १४ केए ४२७७ क्रमांकाच्या पिकअप वाहनावरील चालकाचा ताबा सुटल्याने ते वाहन भरधाव वेगाने समोरून येणाऱ्या एमएच १४ ईजे ७८६३ क्रमांकाच्या दुचाकीवर आदळले. हॉटेल छत्रपतीसमोरील एका धोकादायक वळणावर ही धडक झाली.

धडकेची तीव्रता इतकी जबरदस्त होती की दुचाकीस्वार रामदास दशरथ घोगरे (वय ४०, रा. खानगाव, ता. जुन्नर, जि. पुणे) सुमारे ५० फूट अंतरापर्यंत फरफटत गेले. या भीषण धडकेनंतर पिकअप वाहनही पलटी झाले.

मदतकार्य आणि तपास:अपघाताची माहिती मिळताच स्थानिक नागरिकांनी घटनास्थळी धाव घेत मदतीसाठी पुढाकार घेतला. रामदास घोगरे यांना तातडीने रुग्णवाहिकेद्वारे जुन्नर येथील रुग्णालयात हलविण्यात आले; मात्र वैद्यकीय अधिकाऱ्यांनी तपासणीनंतर त्यांना मृत घोषित केले. घटनेची माहिती मिळताच ओतूर पोलीस ठाण्याचे सहाय्यक पोलीस निरीक्षक ज्ञानेश्वर बाजगिरे यांच्या मार्गदर्शनाखाली पोलिसांचे पथक घटनास्थळी दाखल झाले. पोलिसांनी दोन्ही वाहने ताब्यात घेऊन पंचनामा केला असून अपघाताच्या कारणांचा अधिक तपास सुरू आहे.

स्थानिक नागरिकांनी करंजाळे परिसरातील या धोकादायक वळणावर वारंवार होणाऱ्या अपघातांबाबत चिंता व्यक्त केली असून, तातडीने सुरक्षा उपाययोजना, इशारा फलक आणि वेगनियंत्रण यंत्रणा बसविण्याची मागणी प्रशासनाकडे केली आहे.