Pimpri chinchwad : पिंपरी चिंचवडमध्ये रवी लांडगेंनी बाजी मारली, थेट महापौरपद खेचलं; पण भाजपमध्ये नाराजी वाढली, नेमकं काय घडतंय?

Pimpri-Chinchwad : भाजपचे दोन वेळा बिनविरोध नगरसेवक म्हणून निवडून आलेले रवी लांडगे यांची पिंपरी-चिंचवड महानगरपालिकेच्या महापौरपदासाठी वर्णी लागली आहे. महापौर पदासाठी अर्ज दाखल करण्यासाठी आज दुपारी तीन ते सायंकाळी पाच वाजेपर्यंत वेळ देण्यात आली होती. या दरम्यान अनेक नाट्यमय राजकीय घडामोडी घडल्या.

उपमहापौर पदासाठी भाजपकडून विजय उर्फ शीतल शिंदे यांच्या नावाची जोरदार चर्चा होती. मात्र, ते स्वतः महापौर पदासाठी इच्छुक होते. पक्षश्रेष्ठींनी त्यांचे नाव उपमहापौर पदासाठी निश्चित केल्याने ते नाराज झाले आणि त्यांनी महानगरपालिकेतून काढता पाय घेतला. त्यानंतर राष्ट्रवादी काँग्रेस पक्षाकडून वैशाली काळभोर यांनी उपमहापौर पदासाठी अर्ज दाखल केला. यानंतर भाजपकडून शर्मिला बाबर यांनी आमदारांच्या उपस्थितीत उपमहापौर पदासाठी अर्ज भरला.

Pune Crime : मुंबईतील LLB विद्यार्थिनीने लोणावळ्यात आयुष्य संपवलं; टायगर पॉईंटजवळ ४०० फूट खोल दरीत मृतदेह, धक्कादायक कारण समोर

रवी लांडगे हे २०१७ आणि २०२६ च्या नुकत्याच झालेल्या महानगरपालिका निवडणुकीत बिनविरोध नगरसेवक म्हणून निवडून आले आहेत. त्यांचे चुलते स्वर्गीय अंकुशराव लांडगे हे भाजप चे सक्रिय पदाधिकारी होते. त्यांनी पिंपरी-चिंचवडमध्ये भाजप तळागाळात पोहोचवण्यासाठी मोठे योगदान दिले. मात्र, त्यांच्या कार्यकाळात भाजप सत्तेत येऊ शकला नव्हता आणि पक्षाला विरोधी बाकावर बसावे लागले होते. आता पुन्हा एकदा भाजपची सत्ता आल्याने रवी लांडगे यांच्या महापौरपदाची चर्चा जोर धरू लागली होती. त्यांनीही राजकीय ताकद लावून महापौरपद मिळवल्याची चर्चा आहे.

भाजपकडून महापौर आणि उपमहापौर पदासाठी दोनच अर्ज दाखल करण्यात आले आहेत. येत्या ६ फेब्रुवारीला औपचारिकरित्या महापौर पदाचे नाव जाहीर करण्यात येणार आहे. भोसरी विधानसभा मतदारसंघाला महापौर पद मिळाल्याने रवी लांडगे यांचे राजकीय वर्चस्व वाढण्याची शक्यता नाकारता येत नाही.

राष्ट्रवादीच्या नगरसेविकेने उपमहापौर पदासाठी भरला अर्ज

भाजप नगरसेवक विजय उर्फ शीतल शिंदे यांनी नाराजी व्यक्त करत पालिकेतून काढता पाय घेतल्यानंतर राष्ट्रवादी काँग्रेस पक्षाकडून वैशाली काळभोर यांनी उपमहापौर पदासाठी अर्ज दाखल केला आहे. शीतल शिंदे हे महापौर पदासाठी इच्छुक होते. मात्र, भाजपच्या वरिष्ठ नेत्यांनी त्यांचे नाव उपमहापौर पदासाठी दिल्याने ते नाराज झाल्याचे बोलले जात आहे.

महापौर शर्यतीतून शत्रुघ्न काटे यांचा पत्ता कट

भाजप शहराध्यक्ष शत्रुघ्न काटे यांचा महापौर पदाच्या शर्यतीतून पत्ता कट झाला आहे. गेल्या अनेक वर्षांपासून ते महापौर पदासाठी इच्छुक होते. यावेळी त्यांनी पूर्ण राजकीय ताकद लावली होती. मात्र, विधानसभा निवडणुकीत जगताप यांच्या विरोधात घेतलेल्या भूमिकेचा फटका त्यांना बसल्याचे बोलले जात आहे. त्याचाच वचपा काटे यांना सहन करावा लागला असून, पुन्हा एकदा त्यांच्या पदरी निराशा पडली आहे.

उपमहापौर पदासाठी भाजपकडून शर्मिला बाबर

विजय उर्फ शीतल शिंदे हे उपमहापौर पदासाठी इच्छुक नसल्याने त्यांच्या जागी भाजपकडून शर्मिला बाबर यांनी उपमहापौर पदासाठी अर्ज दाखल केला आहे. त्यामुळे भाजपकडून महापौर पदासाठी रवी लांडगे तर उपमहापौर पदासाठी शर्मिला बाबर यांची नावे जवळपास निश्चित मानली जात आहेत.