Baramati : पुण्यातील धक्क्यानंतर बारामतीत मोठी हालचाल; अजित पवार अचानक शरद पवारांच्या भेटीला

Baramati : बारामतीमध्ये मोठी घडामोड घडताना दिसते आहे. बारामतीतील शरद पवारांच्या गोविंद बाग या त्यांच्या निवासस्थानी उपमुख्यमंत्री अजित पवार , खासदार सुप्रिया सुळे यांची एकत्रित उपस्थिती होती. काल शुक्रवारी महानगरपालिकेच्या निवडणुकांचा निकाल जाहीर झाला. या निवडणुकीमध्ये दोन्ही राष्ट्रवादी काँग्रेसला यश मिळालेलं नाही. या पार्श्वभूमीवर जिल्हा परिषद, पंचायत समिती निवडणुकीमध्ये दोन्ही राष्ट्रवादी एकत्र येणार का? याची उत्सुकता आता लागली आहे. महापालिका निवडणुकांच्या निकालानंतर आज शनिवारी अचानक सकाळी उपमुख्यमंत्री अजित पवार हे शरद पवार यांच्या निवासस्थानी दाखल झाले.

अनेक ठिकाणी उमेदवार पडले
महानगरपालिकेच्या निवडणुकीत भारतीय जनता पक्षाने उपमुख्यमंत्री अजित पवार यांना बाजूला ठेवलं आणि अजित पवार यांना अनेक ठिकाणी फटका बसला. त्याचबरोबर समविचारी पक्षांच्या मत विभागणीमुळे देखील अजित पवारांचे अनेक ठिकाणी उमेदवार पडले.

New BMC Mayor 2026 : २५ वर्षांची ठाकरे सत्ता संपली; मुंबईचा नवा महापौर कधी निवडला जाणार? महत्त्वाची माहिती समोर

जिल्हा परिषद, पंचायत समिती निवडणुकीत काका-पुतणे एकत्र येणार?
या सगळ्या पार्श्वभूमीवर समविचारी पक्ष एकत्र आणून त्याद्वारे जिल्हा परिषद, पंचायत समिती निवडणुकीत नशीब आजमावण्याचा प्रयत्न असू शकतो, अशी देखील चर्चा या निमित्ताने सुरू झाली आहे.

निकालानंतर सकाळीच अजित पवार गोविंदबागेत दाखल
आज शरद पवारांच्या निवासस्थानी अचानक सकाळी उपमुख्यमंत्री अजित पवार पोहोचले. यावेळी खासदार अमोल कोल्हे, खासदार सुप्रिया सुळे, माजी मंत्री राजेश टोपे, आमदार रोहित पवार हे या ठिकाणी उपस्थित आहे. या सर्वांमध्ये नेमकी काय चर्चा झाली याची माहिती मिळू शकलेली नाही, मात्र दोन्ही राष्ट्रवादी जिल्हा परिषद, पंचायत समिती निवडणुकीच्या पार्श्वभूमीवर एकत्र येण्यासंदर्भात चर्चा झाल्या असल्याचं समजतं आहे.

दरम्यान, अजित पवार आणि शरद पवार या दोघांनाही महापालिका निवडणुकीत यश मिळवता आलं नाही. दोघांनाही समाधानकारक आकडा मिळवता आला नाही. या दारुण पराभवानंतर आता काका-पुतण्या एकत्र येणार का? निकालानंतर दोघांच्या भेटीने राजकीय वर्तुळात एकच चर्चा सुरू आहे.