Jalna Accident News : मांगिरबाबाच्या यात्रेला निघालेल्या कुटुंबावर काळाचा घाला; तरुण जागीच ठार, ५ जण जखमी

Jalna Accident News: जालना जिल्ह्यातून भीषण अपघाताची घटना समोर आली आहे. भक्तीभावाने मांगिरबाबाच्या यात्रेला निघालेल्या कुटुंबियावर अचानक काळाने घाला घातला. समोरून भरधाव वेगात येणाऱ्या बसने त्यांच्या चारचाकीला जोरदार धडक दिली. या भीषण अपघात एकाचा मृत्यू झाला. तर ५ जण जखमी झाले. 

जखमींना तातडीने उपचारासाठी रुग्णालयात दाखल करण्यात आलं आहे. जालना ते देऊळगाव राजा दरम्यान जामवाडी गावाजवळ ही दुर्घटना घडली आहे. दरम्यान, अपघातानंतर संतप्त जमावाने बसवर दगडफेक करत काचाही फोडल्याची माहिती आहे.

विजय कौतीकराव जाधव (वय ३५ वर्ष) असं मृत्युमुखी पडलेल्या चारचाकी चालकाचे नाव आहे. तर वैभव जाधव हा १३ वर्षाचा मुलगा गंभीर जखमी झाल्यामुळे त्याला पुढील उपचारासाठी छत्रपती संभाजीनगर येथे हलविण्यात आले आहे 

प्राप्त माहितीनुसार, जाफराबाद तालुक्यातील शिराळा येथील जाधव कुटुंब आज १८ एप्रिल रोजी सकाळी छत्रपती संभाजीनगर जिल्ह्यात असलेल्या शेंद्रा येथील मांगीरबाबा यात्रेसाठी निघाले होते. ७ ते ८ जणांचे एकत्रित कुटुंब मोठ्या उत्साहाने यात्रेसाठी जात असताना जालन्याजवळ समोरून येणाऱ्या बसने त्यांच्या वाहनाला जोरदार धडक दिली.

अपघात इतका भयानक होता की या अपघातात मॅक्झिमा चालक विजय कौतीकराव जाधव (वय ३५ वर्ष) हे जागीच ठार झाले. तर गाडीमधील ४ ते ५ जण जखमी झाले आहेत. अपघात झाल्याच्या मोठ्या आवाजाने रस्त्यावरून जाणाऱ्यांचे लक्ष गेले आणि एकच धावपळ सुरू झाली.

आजूबाजूच्या नागरिकांनी धाव घेत गाडीमध्ये अडकलेल्यांना बाहेर काढले व जखमींना जिल्हा शासकीय रुग्णालयात हलविण्यात आले आहे. अपघातानंतर बस दुभाजकावर जाऊन आदळली होती. यावेळी संतप्त नागरिकांनी बसवर दगडफेक करत बसच्या काचा फोडल्या आहेत. या घटनेनं परिसरातून हळहळ व्यक्त होत आहे.