Ajit Pawar : खळबळजनक! 'अजित पवारांकडून भाजप पदाधिकाऱ्याच्या जीवाला धोका...'; पोलीस ठाण्यात तक्रार दाखाल

Ajit Pawar Pune News : राष्ट्रवादीचे नेते आणि विरोधी पक्षनेते अजित पवार यांच्याविषयी एक मोठी बातमी समोर आली आहे. भाजप पदाधिकारी रविंद्र सळगावकर यांनी अजित पवारांविरोधात पोलीस ठाण्यात तक्रार दाखल केली आहे. अजित पवार यांच्याकडून आपल्या जीवाला धोका असल्याचं त्यांनी यात म्हटलं आहे.

मिळालेल्या अधिक माहितीनुसार, पुण्यातील शिवाजीनगर मतदार संघातील भाजपचे अध्यक्ष रवींद्र सळगावकर यांनी अजित पवार यांच्याविरुद्ध खडक पोलिस ठाण्यात तक्रार दिली आहे. गणेशखिंड रस्त्यावर ई स्क्वेअरच्या समोर असलेल्या प्लॉट संदर्भात रवींद्र सळगावकर यांनी ही तक्रार दिली आहे.

रवींद्र सळगावकर यांनी तक्रारीमध्ये नेमकं काय म्हटलंय?

गणेशखिंड रस्त्यावर ई स्क्वेअरच्या समोर असलेल्या प्लॉटची मोजणी करण्यासाठी पवार दबाव आणत आहेत. मात्र ही मोजणी करता येत नाही त्यामुळे प्लॉटच्या फाइलवर पवारांचं नाव लिहून ठेवण्याचा आरोप रवींद्र सळगावकर यांनी केला आहे. तसेच तक्रारीमध्ये अजित पवारांकडून माझ्या जीवाला धोका असल्याचं देखील त्यांनी यामध्ये म्हटलं आहे.

सळगावकर यांनी त्यांच्या लेटर हेडवर तक्रार लिहून दिली आहे. ही तक्रार पोलिसांनी लिहून घेतली असून अजित पवार यांच्यावर अद्याप कोणताही गुन्हा दाखल करण्यात आलेला नाही. पोलीस या प्रकरणी अधिक तपास करत आहेत.