MVA Rally : मोदींची अशी कोणती डिग्री, जी पाहायला २५ हजार रुपये लागतात; ठाकरेंचा खोचक सवाल

छत्रपती संभाजीनगर - माहाविकास आघाडीच्या वतीने आज छत्रपती संभाजीनगरमध्ये वज्रमुठ सभेचं आयोजन करण्यात आलं आहे. तिन्ही पक्षांनी मिळून ही सभा आयोजित केल्यामुळे या सभेकडे सर्वांचं लक्ष लागलं आहे. या वेळी शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी सरकारवर जोरदार हल्ला चढवला.

उद्धव ठाकरे म्हणाले की, सध्या सावरकर गौरव यात्रा काढण्यात आली आहे. अवश्य काढा. सध्या अनेक ठिकाणी हिंदु जनआक्रोश यात्रा काढण्यात येतोय. मुंबईतही हा मोर्चा निघाला. शिवसेना भवनासमोर हा मोर्चा आला होता. सध्या देशाचे पंतप्रधान हिंदू आहेत. तरी तुम्हाला हिंदू जनआक्रोश मोर्चा का काढावा लागतो, असा प्रश्नही ठाकरे यांनी उपस्थित केला.

यावेळी उद्धव ठाकरे यांनी पंतप्रधान नरेंद्र मोदी यांच्या पदवीवरून हल्ला चढवला. उद्धव म्हणाले की, देशात तरुणांकडे पदव्या आहेत. ते पदव्या दाखवतात, त्यांना सांगण्यात येत तुम्ही घरी जा. पण यांची पदवी मागितली की, २५ हजार रुपये दंड होतो. अशी कोणती डिग्री आहे, की ती पाहण्यासाठी २५ हजार रुपये लागतात, असा सवाल उद्धव यांनी उपस्थित केला.