ED Action : ईडीचा महाराष्ट्रात सर्जिकल स्ट्राईक! मुंबई, नागपुरात मोठ्या प्रमाणात छापेमारी

ईडीने (अमलबजावणी संचालनालय) महाराष्ट्रात मोठी कारवाई केली आहे. पंकज मेहाडिया, लोकेश आणि कथिक जैन यांच्या गुंतवणुकीच्या फसवणुकीसंदर्भात ईडीने नागपूर आणि मुंबईतील १५ ठिकाणी शोध मोहिम केली. यादरम्यान ५.५१ कोटी रुपयांचे बेहिशेबी दागिने आणि १.२१ कोटी रुपयांची रोकड जप्त करण्यात आली आहे. पुढील तपास सुरू आहे, असे ईडीने सांगितले. 

अंमलबजावणी संचालनालयाच्या छाप्यांमुळे नागपुरात खळबळ उडाली आहे. नागपुरात एक-दोन नव्हे, तर ईडीने एकूण १५ ठिकाणी छापे टाकले आहेत.नागपूरचे अनेक स्टील, लोह आणि रिअल इस्टेट व्यावसायिक ईडीच्या रडारवर आहेत. त्यांच्या घरांवर आणि कार्यालयांवर छापे टाकल्यानंतर त्यांची चौकशी आणि चौकशी सुरू आहे. 

या १५ ठिकाणी टाकलेल्या छाप्यांमध्ये अनेक महत्त्वाची कागदपत्रे जप्त करण्यात आली आहेत. या सर्वांचा तपास सुरू आहे. याशिवाय अनेकांची फसवणूक करणाऱ्या पंकज मेहाडियाच्या घरावरही छापा टाकण्यात आला. ईडीच्या या कारवाईमुळे खळबळ उडाली आहे.

पंकज मेहाडिया हा नागपुरातील ठग म्हणून ओळखला जातो. व्याजाचे आमिष दाखवून व्यावसायिकांची फसवणूक केल्याचा आरोप त्याच्यावर आहे. तो नागपूरच्या रामदासपेठ परिसरात राहतो. त्याच्यासह त्याच्या साथीदारांविरुद्ध गुन्हे शाखेच्या आर्थिक शाखेने फसवणुकीचा गुन्हा दाखल केला आहे. २०२१ मध्ये यांना तुरुंगातही पाठवण्यात आले होते. यानंतर काल ईडीने त्यांच्या घरावर छापा टाकला आहे.