Hindu Janakrosh Morcha : आज पुण्यात हिंदु जनआक्रोष मोर्चा; लाल महालापासून होणार सुरुवात

आज पुण्यामध्ये सकाळी 10 वाजता हिंदु जनआक्रोष मोर्चा काढण्यात येणार आहे. दहा वाजता या मोर्चाला लाल महालापासून सुरुवात होणार असून डेक्कन येथील छत्रपती संभाजी महाराजांच्या पुतळ्यापर्यंत मोर्चा जाणार आहे. या मोर्चात वेगवेगळ्या हिंदुत्ववादी संघटना सहभागी होणार आहेत. त्याचबरोबर भारतीय जनता पक्षाचे आमदार, नगरसेवक आणि पदाधिकारीही या मोर्चात सहभागी होणार आहेत.

तेलंगणाचे आमदार राजाभय्या, धनंजय देसाई यांच्यासह अनेक हिंदुत्ववादी कार्यकर्ते हिंदु जनआक्रोष मोर्चामध्ये सहभागी होणार आहेत. या मोर्चासाठी पुण्यातील वाहतूकीत बदल करण्यात आले आहेत.

मोर्चा लाल महाल येथे जमण्यास सुरुवात झाल्यावर फडके हौद चौकाकडून येणारी वाहतूक पूर्णपणे बंद करण्यात येणार आहे. तर मशाल यात्रेस जिजामाता चौक येथे गर्दी झाल्यानंतर आवश्यकतेनुसार, शिवाजी रोडवरून स्वारगेटला जाणाऱ्या वाहनचालकांसाठी स. गो. बर्वे चौकातून जंगली महाराज रोडने खंडोजीबाबा चौक, टिळक रोडने जावे लागेल.

तर गणेश रोड- दारूवाला पुलाकडून फडके हौद चौक जिजामाता चौकाकडे येणारी वाहतूक ही दारुवाला पूल आणि फडके हौद चौकातून इच्छितस्थळी जातील. बाजीराव रोड पूरम चौकातून बाजीराव रोडने महापालिकेकडे येणारी वाहतूक ही सरळ टिळक रोडने अलका चौक आणि खंडोजीबाबा चौकातून जातील. केळकर रोडने अप्पा बळवंत चौकाकडून जोगेश्वरी मंदिर चौकमार्गे बुधवार चौकाकडे येणारी वाहतूक आवश्यकतेनुसार बंद राहील.