पुणे : तुल्यबळ लढतींनी रंगणार यंदाची ‘महाराष्ट्र केसरी’ स्पर्धा! हर्षवर्धन सदगीर, पृथ्वीराज पाटील या माजी विजेत्यांसमोर तगडे आव्हान

अन्य मल्लांमध्ये खालकर तालमीत संभाजी आंग्रे आणि वडील राजेंद्र मोहोळ यांच्याकडे मार्गदर्शन घेणारा पृथ्वीराज मोहोळ हा पदार्पणाच्या स्पर्धेतच प्रभाव पाडेल, असा अंदाज व्यक्त केला जात आहे. पूर्वीचे नामांकित मल्ल अमृता मोहोळ यांचा तो नातू आहे. लातूरचा शैलेश शेळके, विशाल बनकर, माऊली जमदाडे आणि मुंबईकडून खेळणारा आदर्श गुंड हे मल्लही आपली प्रतिभा दाखवण्यासाठी सज्ज झाले आहेत.या स्पर्धेसाठी विविध जिल्ह्यांतून आलेल्या पंचांचा उजळणी वर्ग सोमवारी स्पर्धेच्या ठिकाणी पार पडला. आंतरराष्ट्रीय कुस्ती पंच दिनेश गुंड यांनी या पंचांना मार्गदर्शन केले.

किताब विजेत्या मल्लास चांदीची गदा देण्यात येते. ही प्रथा १९६१ पासून सुरू असली, तरी १९८२ पासून ही गदा राज्य कुस्तीगीर परिषदेचे संस्थापक मामासाहेब मोहोळ यांच्या स्मरणार्थ मोहोळ कुटुंबीयांच्या वतीने त्यांचे चिरंजीव माजी खासदार अशोक मोहोळ यांच्याकडून दिली जाते. यंदा स्पर्धेच्या मान्यतेवरून वाद सुरू असला, तरी स्पर्धा होत असल्याने आम्ही ती गदा परंपरेप्रमाणे देणार, असे अशोक मोहोळ यांच्या वतीने सांगण्यात आले.

प्रत्येक मल्ल एकमेकांविरुद्ध खेळला आहे. प्रत्येक जण प्रतिस्पर्ध्याची तयारी आणि ताकद ओळखून असल्यामुळे या वेळी लढती तुल्यबळ होतील यात शंकाच नाही. त्याचबरोबर, पंचही दर्जेदार असून, त्यांचा उजळणी वर्ग सोमवारी पार पडला आहे. पंचांचीही कामगिरी चांगली होईल, असे आंतरराष्ट्रीय कुस्ती पंच दिनेश गुंड यांनी सांगितले.

सहभागी मल्ल पूर्ण तयारीने उतरले आहेत. प्रत्येकाकडे चांगल्या कामगिरीची क्षमता आहे. आखाड्यात आणि गादीवर होणाऱ्या लढतीदरम्यान कोण वरचढ ठरणार याचा अंदाज बांधणे कठीण आहे. स्पर्धा रंगतदार होईल, असे मत माजी हिंद केसरी विजेता मल्ल योगेश दोडके यांनी व्यक्त केले.