मुंबई : एकीकडे कोरोनाचा धोका, दुसरीकडे राज्यातील निवासी डॉक्टर आजपासून संपावर;

मुंबई :  वैद्यकीय क्षेत्रातून एक चिंताजनक बातमी समोर येत आहे. राज्यातील निवासी डॉक्टरांनी आज (२ जानेवारी) पासून संप पुकारला आहे. या संपामध्ये राज्यातील ५ हजारांहून अधिक डॉक्टर सहभागी होणार आहेत. आपल्या मागण्यांसाठी चर्चाकरण्यासाठी सरकारला शनिवार पर्यंत वेळ देण्यात आला होता. मात्र शनिवार आणि रविवारचा दिवस गेला तरी कोणतीही प्रतिक्रिया न आल्याने डॉक्टरांनी आता संपाचं हत्यार हाती घेतलं आहे. त्यामुळे राज्यासाठी ही मोठी चिंतेची बाब बनली आहे. 

मार्ड डॉक्टरांच्या संघटनेने सरकारला १ जानेवारीपर्यंत वेळ दिला होता. मात्र चर्चेसाठी सरकारने कोणताही निर्णय न घेतल्याने त्यांनी संपाचा निर्णय घेतला आहे. मार्ड डॉक्टर संपावर गेल्याने पर्यायी सुवेधांसाठी प्रशासनाकडून हालचाली सुरू आहेत. चीनमध्ये कोरोनाचा उद्रेक पाहायला मिळत आहे. अशात याचा फटका इतर देशांना बसण्याची शक्यता आहे. ३१ डिसेंबर रोजी चीनमध्ये मोठा जल्लोष साजरा करण्यात आला. यामुळे रुग्ण संख्येत आणखीन भर पडली आहे. त्यामुळे या काळात आरोग्य यंत्रणा सतर्क असणे फार गरजेचे आहे. मात्र अशा प्रसंगी डॉक्टरांनी संप पुकारल्याने पुढे मोठे संकट ओढावण्याची भीती व्यक्त केली जात आहे.