दिल्ली : नात्याला काळिमा! एकाच कुटुंबातील वडील, 2 बहिणींसह आजीची मुलानं केली चाकूनं भोसकून हत्या

Delhi Crime News : श्रध्दा वालकर हत्याकांडाचं (Shraddha Walker Murder Case) प्रकरण ताजं असतानाच आता देशाची राजधानी दिल्ली (Delhi) पुन्हा एकदा क्रूरतेच्या घटनेनं हादरलीय. दिल्लीच्या दक्षिण-पश्चिम जिल्ह्यातील पालम भागातून एक खळबळजनक घटना समोर आलीय. राज नगर पार्ट-2 येथील एका घरात चार जणांचे मृतदेह आढळून आले आहेत.

मिळालेल्या माहितीनुसार, एका मुलानं वडील, दोन बहिणी आणि आजीची चाकूनं हत्या केलीय. मंगळवारी रात्री 10.30 वाजण्याच्या सुमारास पोलिसांना या घटनेची माहिती मिळाली. त्यानंतर पोलीस घटनास्थळी पोहोचले. पोलिसांनी मृतदेह ताब्यात घेऊन शवविच्छेदनासाठी पाठवले आहेत. प्राथमिक माहितीनुसार मुलावर हत्येचा आरोप आहे. पोलिसांनी या मुलाला अटक केलीय.

दिल्ली पोलिकांच्या सूत्रांनी दिलेल्या माहितीनुसार, आरोपी मुलगा अंमली पदार्थांचं व्यसन करत होता. काही दिवसांपूर्वीच तो व्यसनमुक्ती केंद्रातून परत आला आहे. घरात कशावरून तरी भांडण झालं, त्यानंतर त्यानं चौघांची हत्या केली. खून केल्यानंतर आरोपी मुलगा पळून जाण्याचा प्रयत्न केला नाही. तो घरातच मृतदेहाजवळ बसून राहिला. सध्या त्याला अटक करून चौकशी करण्यात येत आहे.