पुणे: कारेगावात दिवसाढवळ्या थरारक गोळीबार पाण्याच्या प्लँटवर कामावर गेलेल्या तरुणाच्या डोक्यात गोळी झाडून निर्घृण हत्या!

पुणे: कारेगाव (ता. शिरूर) येथील साईनगर परिसरात पाण्याच्या प्लॅटवर कामाला गेलेल्या एका इसमावर अज्ञात व्यक्तीने पिस्तुलातून गोळीबार केल्याची घटना मंगळवारी (दि. २९) सकाळी घडली. या गोळीबारात हमजा उस्मान शेख (वय ३९, सध्या रा. कारेगाव, मूळ रा. धानोरा काळे, ता. पूर्णा, जि. परभणी) यांचा मृत्यू झाला. या घटनेने कारेगाव परिसरात खळबळ उडाली आहे.

याबाबत मृताची पत्नी अबिताबी हामजा शेख (वय ३७) यांनी रांजणगाव एमआयडीसी पोलिस ठाण्यात फिर्याद दिली आहे. त्यानुसार, हमजा शेख हे नेहमीप्रमाणे सकाळी साईनगर येथील समु इंटरप्रायजेस अॅक्वा रिच या पाण्याच्या प्लॅटवर कामासाठी गेले होते. यावेळी अज्ञात व्यक्तीने पिस्तुलातून त्यांच्यावर गोळी झाडून त्यांचा खून केल्याचे फिर्यादीत नमूद करण्यात आले आहे. या प्रकरणी अज्ञात व्यक्तीविरुद्ध रांजणगाव एमआयडीसी पोलिस ठाण्यात गुन्हा दाखल करण्यात आला आहे. गोळीबाराचे नेमके कारण अद्याप स्पष्ट झालेले नाही.

हत्येचे कारण अद्याप अस्पष्ट, पोलिसांचा तपास सुरू

या हत्येमागील नेमके कारण अद्याप पूर्णपणे अस्पष्ट आहे. हा खून पूर्ववैमनस्यातून, जुन्या वादातून की सुपारी देऊन (Contract Killing) घडवून आणला गेला आहे, याविषयी पोलीस कसून तपास करत आहेत. घटनेची माहिती मिळताच पुणे ग्रामीण पोलीस दल आणि स्थानिक गुन्हे शाखेची पथके तातडीने घटनास्थळी दाखल झाली. पोलिसांनी मृतदेह ताब्यात घेऊन तो शवविच्छेदनासाठी पाठवला आहे.

परिसरातील गुन्हेगारी पार्श्वभूमी आणि संशयितांचा शोध घेण्यासाठी पोलिसांनी आजूबाजूच्या परिसरातील सीसीटीव्ही (CCTV) फुटेज ताब्यात घेतले असून त्यांची कसून छाननी सुरू आहे. फुटेजमध्ये दुचाकीवर आलेले संशयित हल्लेखोर स्पष्टपणे दिसत असून, त्यांच्या शोधार्थ पोलिसांची विविध पथके वेगवेगळ्या दिशेने रवाना करण्यात आली आहेत. भर दिवसा घडलेल्या या खुनामुळे नागरिकांमध्ये सुरक्षेचा मोठा प्रश्न निर्माण झाला असून, आरोपींना लवकरात लवकर अटक करावी, अशी मागणी ग्रामस्थांकडून होत आहे.

घटनेची माहिती मिळताच पुणे ग्रामीणचे पोलिस अधीक्षक संदीपसिंह गिल्ल, उपविभागीय पोलिस अधिकारी रवींद्र भोसले आणि पोलिस निरीक्षक कुमार कदम यांनी घटनास्थळी भेट देऊन पाहणी केली. पोलिस निरीक्षक कुमार कदम यांच्या मार्गदर्शनाखाली सहायक पोलिस निरीक्षक अनिल मोरडे पुढील तपास करीत आहेत. आरोपीचा शोध घेण्यासाठी पोलिसांकडून तपास सुरू आहे.