Sunita Williams : सुनीता विल्यम्स यांनी अंतराळातून दिल्या दिवाळीच्या शुभेच्छा; वडिलांची आठवण काढत म्हणाल्या…

Sunita Williams : नासामधील भारतीय वंशाच्या अंतराळवीर सुनीता विल्यम्स यांनी आंतरराष्ट्रीय अंतराळस्थानकावरून (आयएसएस) व्हिडीओ संदेश जारी करत दिवाळीच्या शुभेच्छा दिल्या आहेत. व्हाईट हाऊसमध्ये दिवाळी निमित्त आयोजित कार्यक्रमात त्यांचा हा व्हिडीओ दाखवण्यात आला. या व्हिडीओत त्यांनी त्यांच्या वडिलांची आठवणही काढली. तसेच त्यांनी राष्ट्राध्यक्ष जो बायडेन आणि उपराष्ट्राध्यक्ष कमला हॅरीस यांचे आभारही मानले. सुनीता विल्यम्स या दीर्घकाळापासून अंतराळात अडकल्या आहेत.

व्हिडीओ संदेशात नेमकं काय म्हणाल्या सुनीता विल्यम्स?

अंतराळ स्थानकावरून मी सर्वांना दिवाळीच्या शुभेच्छा देते. यंदा मला पृथ्वीपासून २६० मैल दूर अंतराळात दिवाळी साजरी करण्याची संधी मिळाली आहे. माझ्या वडिलांनी आम्हाला दिवाळी आणि इतर सण साजरे करण्यास तसेच आपली सांस्कृतिक मुल्ये जपण्यास शिकवलं. दिवाळी हा आनंदाचा क्षण आहे, असे त्या म्हणाल्या.

Pune : समाविष्ट गावांतील मतदार ‘निर्णायक’

जो बायडेन आणि कमला हॅरिस यांचे मानले आभार

पुढे बोलताना त्यांनी व्हाईट हाऊसमध्ये दिवाळी साजरी केल्याबद्दल राष्ट्राध्यक्ष जो बायडेन आणि उपराष्ट्राध्यक्ष कमला हॅरिस यांचे आभारही मानले. भारतीय समुदायाबरोबर दिवाळी साजरी केल्याबद्दल मी राष्ट्राध्यक्ष जो बायडेन आणि उपराष्ट्राध्यक्ष कमला हॅरिस यांचे आभारही मानते, अशी प्रतिक्रिया त्यांनी दिली.

विल्यम्स, विल्मोर अजूनही अवकाशात का अडकलेत?

५ जून रोजी सुनीता विल्यम्स आणि बुच विल्मोर बोईंग स्टारलायनरच्या चाचणी मोहिमेसाठी आंतरराष्ट्रीय अंतराळस्थानकावर (आयएसएस) रवाना झाले होते. ही स्टारलायनरची पहिलीच मानवी मोहीम होती. ते आठ दिवसांत परत येण्याची अपेक्षा होती; परंतु त्यांच्या परतीच्या प्रवासापूर्वी अंतराळयानातील काही प्रमुख यंत्रणांमध्ये समस्या आढळून आल्या. प्रोपल्शन सिस्टीममध्ये म्हणजेच यानाला पुढे ढकलणार्‍या उपकरणात गळती झाली आणि त्यातील काही थ्रस्टर्स बंद पडले. या तांत्रिक बिघाडांमुळे स्टारलाइनर क्रूशिवाय पृथ्वीवर परतले. दरम्यान, दोघांनाही परत आणण्यासाठी नासाद्वारे प्रयत्न सुरु आहेत. ते फेब्रुवारी २०२५ मध्ये पृथ्वीवर परत येण्याची शक्यता आहे.