Satyajeet Tambe : इंग्रजी शाळांना आरटीई शुल्क प्रतिपूर्तीची कोटयवधीची थकित रक्कम कधी देणार? सत्यजीत तांबेंचा सरकारला सवाल

Mumbai  : इंग्रजी शाळांना देण्यात येणाऱ्या आरटीई शुल्क प्रतिपूर्तीची कोट्यवधी रुपयांची थकित रक्कम कधी देणार? असा प्रश्न आमदार सत्यजीत तांबे यांनी विधानपरिषदेत विचारला. आरटीईसाठी २०२३-२४ च्या अर्थसंकल्पामध्ये २०० कोटी रुपयांची तरतूद करण्यात आल्याची माहिती शालेय शिक्षणमंत्री दीपक केसरकर यांनी दिली.

राज्य शासनाने विना अनुदानित खाजगी शाळांना आरटीई अंतर्गत २५ टक्के राखीव जागेवर सामाजिक व आर्थिकदृष्ट्या दुर्बल घटकांतील विद्यार्थ्यांना प्रवेश देणे बंधनकारक केले आहे. त्यासाठी प्रत्येक विद्यार्थ्यांच्या मागे शासनाकडून शाळेला दरवर्षी १७,६७० रुपये अनुदान दिले जाते. कोरोनामुळे मागील ३ वर्षे प्रति विद्यार्थी प्रति वर्ष ८ हजार रूपये अनुदान देण्याचे सरकारने निश्चित केले होते.

सन २०२३-२४ या शैक्षणिक सत्रापासून पूर्वीप्रमाणे प्रत्येक विद्यार्थ्यांमागे १७ हजार ७७० रूपये एवढी रक्कम देण्याचा निर्णय शासनाने घेतला आहे का? असा प्रश्न विचारुन कोल्हापूर शहरातील काही शाळांना सदर अनुदान गेल्या तीन वर्षापासून शासनाकडून मिळालेले नाही, याकडे आमदार सत्यजित तांबे यांनी लक्ष वेधले.

Konkan Railway : कोकणातील रेल्वे स्थानकांचा कायापालट होणार, मुख्यमंत्र्यांच्या उपस्थितीत झालं भूमिपूजन

या विद्यार्थ्यांच्या प्रवेश शुल्काची प्रतिपूर्ती सन २०१७ पासून संबंधित शाळांना शासनाकडून न झाल्याने तसेच शिक्षणाचा हक्क कायद्यांतर्गत (आरटीई) पोर्टलवर अर्ज सादर करताना २५ मार्चपूर्वीची कागदपत्रे असल्याची हमी देऊन अनेक पालकांनी या तारखेनंतरची कागदपत्रे काढल्याने तसेच राखीव ठेवलेल्या जागांवर अर्ज करताना पोर्टलवर अपलोड करण्याची सुविधा नाही, या कारणास्तव विद्यार्थ्यांचे प्रवेश नाकारण्यात येत आहेत, याकडे सत्याजीत तांबे यांनी सरकारचे लक्ष वेधले.

आरटीई अंतर्गत विद्यार्थ्यांना प्रवेश देण्यास शाळा उदासीन असून आरटीई अंतर्गत भरण्यात येणाऱ्या सुमारे १ लाख १ हजार जागांपैकी सुमारे ३०% जागा रिक्त राहत असल्याचे निदर्शनास आले का? ९ हजार ५३४ शाळांमध्ये आरटीई प्रवेश दिले जातात. त्यामध्ये ४ लाख विद्यार्थ्यांना मोफत प्रवेश दिला जातो. खाजगी विनाअनुदानित इंग्रजी शाळांना देण्यात येणारे आरटीई प्रतिपूर्तीचे १ हजार ८०० कोटी रुपये थकवण्याची कारणे काय आहेत, तसेच सदर थकित रक्कम देण्याबाबत कोणती कार्यवाही केली? असा प्रश्न आमदार सत्यजित तांबे यांनी उपस्थित केला.