Sarpanch : 'बाबा, तुम्हीच आमचे विठ्ठल' वारीहून वडील परतले, सरपंच मॅडमच्या कृतीने वेधलं लक्ष; नेटकरी भावूक

 

Sarpanch  : राष्ट्रवादी काँग्रेस अजित पवार गटाच्या नेत्या आणि पुणे जिल्ह्यातील कारेगावच्या सरपंच निर्मला नवले नेहमी चर्चेत असतात. निर्मला सोशल मीडियावर सक्रीय असतातत. त्यांचा चाहतावर्ग खूप मोठा आहे. त्यांचे पोस्ट व्हायरल होत असतात. समाजसेवासह धार्मिक विधींचे व्हिडिओ आणि फोटोही आवर्जून सोशल मीडियावर शेअर करतात. सध्या त्यांच्या एका व्हिडिओला तुफान प्रतिसाद मिळालेला आहे. नवले यांनी त्यांच्या कृतीतून नेटकऱ्यांची मने जिंकली आहेत.

निर्मला नवले यांचे वडील पंढरपुरात विठ्ठल रखुमाईंचे दर्शन घेऊन घरी परतले. त्यानंतर निर्मला नवले यांनी त्यांच्या वडिलांचं स्वागत केलं. नवले यांनी वडिलांचे पाय धुतले. तसेच आशीर्वाद घेतला. यावेळी त्यांनी वडिलांचे औक्षण देखील केलं. त्यांनी या क्षणाचा व्हिडिओ शूट करून सोशल मीडियावर शेअर केला आहे. त्यांनी हा व्हिडिओ शूट करून भावनिक कॅप्शनसह शेअर केला आहे. या व्हिडिओवर नेटकऱ्यांनी कमेंट करत कौतुक केलं आहे.

व्हिडिओ शेअर करताना निर्मला यांनी कॅप्शनमध्ये लिहिलं की, 'पांडुरंगाचे दर्शन घेऊन आमचे बाबा परतले आहेत. पंढरीची वारी ही खरंतर श्रद्धेची, भक्तीची आणि समाधानाची यात्रा असते. आमचे बाबा आज पंढरीची वारी करून घरी परतले. थकवा असेल, पण खरंतर त्यांच्या चेहऱ्यावर समाधान आहे. पाय जड झाले आहे, पण मन हलकं झालं आहे. पांडुरंगाच्या दर्शनाने त्यांचं मन भरून आलंय, आमचं घर भक्तीमय झालंय... पांडुरंग विठ्ठल..'

निर्मला नवले यांच्या व्हिडिओवर नेटकऱ्यांनी त्यांचं कौतुक केलं आहे. तसेच त्यांनी केलेल्या कृतीची प्रशंसा केली आहे. या व्हिडिओवर नेटकऱ्यांनी लाईक्स आणि कमेंट्सचा वर्षाव केला आहे. सध्या त्यांचा हा व्हिडिओ सोशल मीडियावर तुफान व्हायरल होत आहे.